Muqdisho, 04 April 2025 – Hay’adda Socdaalka iyo Jinsiyadda Soomaaliya ayaa shaacisay in ay qabatay 124 dhalinyaro Soomaaliyeed oo ku wajahnaa safarro tahriib ah saddexdii bilood ee ugu dambeysay. Dhalinyaradan oo da’doodu u dhexeyso 18 ilaa 25 sano ayaa la qabtay xilli ay qorsheynayeen inay si sharci darro ah uga dhoofaan dalka una socdaan waddamada Yurub, Aasiya iyo Afrika.
War-saxaafadeed ay hay’addu soo saartay ayaa lagu sheegay in dhammaan dhalinyarada la qabtay lagu helay caddeymo muujinaya inay ku lug lahaayeen tahriib sharci darro ah, isla markaana lagu wareejiyay hay’adaha amniga ee dowladda Federaalka.
Hay’addu waxay sidoo kale balan qaaday inay sii laba jibbaari doonto dadaallada lagu baabi’inayo tahriibka, iyadoo si gaar ah u baari doonta shaqsiyaadka iyo shirkadaha socdaalka ee ku lugta leh arrimaha tahriibka.
Hay’adda ayaa sidoo kale sheegtay in ay qorsheneyso Wacyi-gelin ay u jeedin doonto dhalinyarada iyo waalidiinta Soomaaliyeed si kor loogu qaado fahamka ku aaddan khataraha tahriibka iyo badaha halista ah.
