Baydhabo, Koonfur Galbeed Soomaaliya – Maxkamadda Gobolka Baay ayaa xukun dil ah ku fulisay laba dhalinyaro ah oo lagu helay dembi ah inay dileen Xaawa Luul Cabdiladhiif Macallin.
Toogashada oo ka dhacday goob fagaare ah oo ku taalla Baydhabo ayaa waxaa fuliyay Xafiiska Xeer Ilaalinta Koonfur Galbeed, kaas oo xaqiijiyay in Mukhtaar Maxamed Nuur iyo Nuur Maxamed Xasan ay ka dambeeyeen dilka Xaawa Luul Cabdiladhiif.
“Xafiiska Xeer Ilaalinta Koonfur Galbeed wuxuu fuliyay xukunkii dilka ahaa ee lagu riday Mukhtaar Maxamed Nuur, 20, iyo Nuur Maxamed Xasan, 20, kuwaas oo lagu helay in ay dileen Xaawa Luul Cabdiladhiif Macallin,” ayaa lagu yiri warbixinta xeer ilaalinta.
Dilka ayaa dhacay 9-kii Febraayo, 2025, magaalada Baydhabo, halkaas oo Mukhtaar iyo Nuur ay tooreey ku dileen Xaawa Luul si ay uga qaataan taleefankeeda gacanta.
Maxkamadda Gobolka Baay ayaa shalay dhageysatay kiiska, waxayna isla maalintaas fulisay xukunka, sida ay shaacisay warbaahinta rasmiga ah ee Koonfur Galbeed.
Wasiirka Amniga ee Koonfur Galbeed oo ka hadlay goobta toogashada ayaa sheegay in xukuumaddu sii wadi doonto fulinta xukunada maxkamadaha, si loo xaqiijiyo cadaaladda.
