Hargeysa (Dawan)- Cabdiraxmaan Cirro, Guddoomiyihii golaha wakiilada ugu muddada dheeraa ee baadi goobaya madaxtinimada Somaliland.
Nuxurka
Goobta / Goorta dhalashada; Hargeysa, 1955
Waxbarashada: Xisaabaadka
Shaqada: Aas-aasaha iyo hogaamiyaha xibiga Waddani
Cabdiraxmaan Cirro waxa uu ahaa Guddoomiyihii ugu muddada dheeraa ee Golaha wakiilada Somaliland, waana marki labaad ee uu isu soo taago kurisga ugu sarreeya Somaliland. Bal aan isla eegno sooyaalka iyo khibraddiisa siyaasadeed.
Barbaar, waxbarasho iyo shaqooyinkiisi ugu horeeyay
Cabdiraxmaan Maxamed Cabdillaahi oo ku magac dheer “Cirro” wuxuu ku dhashay magaalada Hargeysa bartamihii 1950 meeyadii, isaga oo waxbarashadiisa asaasiga ah kusoo qaatay magaalooyiinka Burco , Berbera, Hargeysa iyo Sheekh.
Cirro, waxa uu haystaa shahaadooyin kala ah duwan oo la xiriira xisaadbaadka, Xallinta Khilaafaadka iyo shaaado sharaf PHD ah oo ay siisay jaamacad lagu magacaabo New Generation University, sida ku qoran sooyaalkiisa nololeed ee lagu daabacay website-ka xisbiga Waddani.
Intaas waxa u dheer inuu ku hadlo luqadaha Soomaaliga, Ingiriisiga, Carabiga, Raashiyaanka, iyo Finnish-ka.
Xilligi dowladdii dhexe waxa uu kasoo shaqeeyay hay’addii horumarinta danwadaagaha ee Muqdisho., kadibna wuxuu ku biiray wasaaradda arrimaha dibadda Soomaaliya. Wax yar ka hor burburkii dowladdii dhexe waxa uu noqday sii hayihii safaaradii Soomaaliya ee dalka Ruushka.
Burburkii Dowladdii dhexe ee Soomaaliya kaddib, waxa uu Cirro kusoo noqday Somaliland isaga oo ka qeyb-galay dadaalladdii hormarinta siyaasadda iyo ganacsiaga.
Guddoomiyihii ugu muddada dheeraa golaha wakiilada
Cirro, waxa uu ahaa siyaasiyiintii ugu horreysay ee dhidibadda u taagay nidaamka Xisbiyada badan ee Jamhuuriyadda iskeed isku magacaawday ee Somaliland kuwaas oo hana-qaaday sannadkii 2002dii, waxa uuna soo noqday ku xigeenkii xoghayaha guud ee xisbiga UCID.
Sannadkii 2005tii waxaa loo doortay xubin ka mid Baaralamaankii ugu horreeyey ee shacabku soo doortay.
Cirro waxa loo dooratay gudoomiyaha Golihii Wakiilada ee lagu soo doortay markii ugu horeysay cod dad-weyne, isaga oo noqday Guddoomiyihii ugu muddada dheeraa ee Golaha intii ay Somaliland jirtay isaga oo maamulayay muddo 12 sano ah.
2dii August 2017 ayuu iska casilay guddoomiyanimadii Golaha Wakiilada.
Cirro ayaa sidoo kale ah xubin sharafeed ka tirsan Golaha Guurtida ee Somaliland
Kadib markii uu khilaaf soo kala dhaxgalay hogaanka xisbiga UCID waxa uu sanadkii 2012 ku dhawaaqay xisbiga Waddani ee uu mucaardka ah..
Dad badan ayaa aaminsan in xisbiga Waddani uu ku guuleysan karo doorashada madaxtinimada marka la eego guulihii uu kasoo hooyay doorashooyinkii ugu dambeeyay ee dhacay.
Cirro iyo xisbigiisu waxay ku gelayaan doorashada qorsha siyaasadeed oo ka kooban lix tiir oo ay ka mid yihiin difaaca Somaliland, wax ka qabashada arrimaha bulshada iyo kor u qaadidda kaalinta haweenka iyo dhallinyarada
Makula tahay in Waddani uu hoggaanka Somaliland kala wareegi doono Kulmiye?
