Wasiirka Amniga Soomaaliya mudane Maxamed Axmed Doodishe oo ka hadlay kulan ay soo qaban qaabiyeen qaar ka mid qurba joogta Soomaaliyed kana dhacay Ohio ee dalka Mareykanka ayaa caddeeyay in aysan jirin muddo kordhin loo sameeyn doono ciidamada nabad ilaalinta ee jooga Soomaaliya.
Wasiirka amniga ayaa sheegay in ay jirto rejo wanaagsan taas oo kenatay kor u kaca maalgashiyada ganacsatada Soomaaliyeed ay ka samaynayaan dalka, taas oo caddeyn u ah in kalsooni badan lagu qabo amniga iyo dadaallada dib u xoreynta oo ay dawladdu hoggaaminayso.
Wasiirka ayaa intaas ku daray in lasoo gaba-gabeyn doono bixitaanka ciidamada nabad ilaalinta u jooga Soomaliya dhamaadka sanadka soo socda, isagoo xusay in 2000, oo askari ka baxeen dalka bishii June ee lasoo dhaafay.
“Dawladdu, waxa ay Ka shaqaynaysaa sidii ay gacanta ugu dhigi lahayd amniga dalka dhammaan qaybhihiisa kala duwan. Waxaa bilaabmay bixitaanka ciidamada ATMIS, kuwaas oo dalka ka wada bixi doona dhammaadka sannadka soo socda, waxaana kaalintooda buuxin doona Ciidanka Xoogga Soomaaliyeed oo dhismihiisu meel fiican marayo” ayuu yiri wasiir Doodishe.
Ciidamada ATMIS ayaa hore ugu howl geli jiray magaca AMISOM, waxaana dhowr jeer loo sameeyay muddo kordhin, iyadoo lagu sababeeyey in dagaalyahanada Al-shabaab weli ku xooganyihiin Soomaaliya .
Hadalka wasiirka ayaa imaanaya xilli beryihii danbe uu jiray shaki laga qabo bixitaanka ciidamada nabad ilaalinta u jooga Soomaaliya, maadaama uu weli socodo dagaalka u dhaxeeya dowladdda iyo Al-shabaab.
