Hargeysa (Dawan)- “Ma garanayo waqtiga dhabta ah” Sidaas waxaa TV-ga Al-Carabiya u sheegay mas’uulka ugu sarreeya Somaliland Muuse Biixi Cabdi mar la waydiiday xilliga heshiis loo bedelayo is-afgaradkii uu la galay Abiy Axmed.
Arrintan waxay sii xoojisay hubanti la’aanta ku xeeran xilliga uu hirgelayo is-afgradka Itoobiyo iyo Somaliland oo hadda laga joogo muddo sagaal bilood ah.
Intii ka dambeysay ku dhawaaqistii is-afgaradka ma dhicin kulamo kale oo heer sare ah, lamana qaadin tillaabo u gogol xaareysa ujeedooyinkii heshiiska.
Qorshaha Abiy Axmed
Sida ay dad badan aamisanyihiin, Abiy Axmed ma doonayo inuu ku degdego dhamaystirka heshiiska inta ay ka dhamaanayaan laba arrin:
- Wadahdalka u socda Muqdisho iyo Addis Ababa: is-afgaradku waxa uu Abiy Axmed u yahay wax uu ku gorgortamo marka la joogo wadahadallada uu kula jiro Soomaaliya, natiijada kasoo baxdana waxay saameyn ku yeealn doonta is-afgaradka.
- Doorashada Somaliland: Wax yar ayaa ka haray qabsoomidda doorashada madaxtinimo ee Somaliland, waana qodob kale oo saameyntiisa wata, sidaas darteed Abiy ma doonayo inuu ka hor dhaco doorashada.
Dhaqdhaqaayada ka socda gobolka
Is-fahanka Somaliland iyo Itoobiya ee ay isku waydaarsanayaan aqoonsi iyo bad, waxa uu xiisad ka abuuray gobolka Geeska Afrika oo marki horaba la daalla dhacayay colaado kala jaad ah, faragelin shisheeye, iyo masiibooyiin dabiici ah.
Soomaaliya iyo Itoobiya waxay qarka u saaranyihiin inay foodda is daraan, marka la eego hadalada ay warbaahinta isku marinayan, dhaqdhaqaayada ciidan iyo mowqifyada ay ka aaminsanyihiin qaddiyadda badda.
Eritrea waxay xiratay aaggeeda, oo way ku dhaqmaysayaa mabda’ ah “ biyo intaysan kusoo gaarin ayaa la iska muusaa”
Masar warkeeda waa cadyahay, oo waxay hiil iyo hooba la garab taagantahay Soomaaliya, waxayna u argata inay heshay fursad ay Itoobiya uga mashquulin karto dhamaystirka biya xireenka wabiga Nile oo Masaarida uga dhigan “ Nolol ama Geeri”
Jabuuti iyo Kenya; labadaba dhegta ayaa u taagan balse waxay rajo ka qabaan in xiisadda lagu qaboojin karo hannaan diblomaasiyadeed.
Dadaallada Turkiga
Ankara laba jeer ayay martigelisay wafuud ka socotay Soomaaliya iyo Itoobiya inkasta oo wadahadalaldii ay yeesheen aysan kasoo bixin natiijo ka duwan in markale la kulmo.
Turkidu hadda waxay doonayan inay hanaan cusub ku wajahaan wareegga seddexaad ee wadahadallada kaas oo ka cadaadis adag kuwii hore, iyaga oo ka faa’iideysanaya cashiradii ay ka barteen kulamadii hore ee kusoo dhamaaday gacma daalis.
