Addis Ababa (Dawan)- Wasiirka Arrimaha Dibadda Ireland, Micheál Martin ayaa ku dhawaaqay in dowladdiisu ugu deeqday Itoobiya lacag dhan 15 milyan oo Yuuro si wax looga qabto horumarinta iyo gargaarka bini’aadantinimo.
Arrintan ayaa timid kadib markii uu kulan kula qaatay Addis Ababa, Wasiirka Maaliyadda Itoobiya Axmed Shide, iyaga oo kawada hadlay xaaladaha dhaqaale ee ka jira dalka iyo sida looga soo kaban karo colaadaha iyo abaaraha ka dhacay Itoobiya waayihii ugu dambeeyay.
Wasiirka Arrimaha Dibadda Ireland, ayaa hoosta ka xariiqay muhiimadda ay labada dal u leedahay in la xoojiyo iskaashiga dhaqaalaha si looga mira dhaliyo himlada labada shacab ee ah in la gaaro isbedel dhaqaale oo casri ah, isaga oo ballan qaaday inay Itoobiya ka taageerayaan wax u qabashada dadka ku waxyeelloobay colaadaha ” Waxaa kale oo naga go’an inaan taageerno dadka dhibanayaasha u noqday colaadaha.”
Wasiirka ayaa sidoo kale kulan la qaatay Guddiga Wada-tashiga Qaranka, isaga oo la wadaagay khibradda ay dowladdiisu u leedahay ka shaqaynta nabadeynta iyo dib u heshiisiinta bulshooyinka la kulmay colaadaha sokeeye, isaga oo u fidiyay Guddiga martiqaad dabayaaqada sannadkan.
“Ka shaqaynta Nabadda iyo dib-u-heshiisiintu waxay noqon karaan waddo dheer, wax badan oo aan ka baran karno ayaa jira. Waxaan rajaynayaa in aan xubnaha Guddiga ku soo dhaweeyo Ireland dabayaaqada sanadkan.” ayuu yiri; Martin
Martin waxa kale oo uu booqday Guriga Badbaadada ee Ururka Haweenka oo ah xarun taageerta haweenka ay waxyeelladu kasoo gaartay colaadaha ka jira dalkaas, wuxuuna ugu deeqay 100,000, oo Yuuro,isaga oo tilmaamay in dowladdiisu kaalin wayn ka qaadato wax ka qabashada iyo gacan siinta haweenka la kulma xadgudubyada.
Wasiirka Arrimaha Dibadda Ireland, Micheál Martin ayaa soo gabagabeeyay booqasho uu ku marayay Geeska Afrika gaar ahaan dalaka Kenya iyo Itoobiya, isaga oo kulamo la qaatay mas’uuliyiinta labadaas dal iyo qaar ka mid ah ururada bulshada rayidka.
