Soomaaliya iyo Itoobiya ayaa ku heshiiyay inay si wadajir ah uga shaqeeyaan Hawlgalka Midowga Afrika ee Soomaaliya (AUSSOM), iyagoo sidoo kale xoojinaya xiriirka siyaasadeed iyo nabadgelyada labada dal. Tallaabadan ayaa timid kadib booqasho rasmi ah oo wafdi heer sare ah oo Itoobiyaan ah ku yimaadeen Muqdisho, wafdigaas oo uu hoggaaminaysay Wasiirka Gaashaandhigga Itoobiya, Aisha Mohammed.
Qoraal ka soo baxay Wasaaradda Arrimaha Dibadda ee Itoobiya ayaa lagu sheegay in labada dhinac ay ka wada hadleen iskaashiga ku saabsan hawlgalka AUSSOM, kor u qaadista booqashooyinka is-dhaafsiga ah ee madaxda labada dal, iyo iskaashiga la dagaallanka argagixisada si loo xaqiijiyo xasilloonida gobolka Geeska Afrika.
Heshiisyada la gaaray waxaa ka mid ah:
- In Soomaaliya iyo Itoobiya iska kaashadaan hawlgalka AUSSOM.
- In la kordhiyo booqashooyinka madaxda labada dhinac, iyadoo la filayo in mas’uuliyiin sare oo Soomaali ah ay dhawaan booqdaan Addis Ababa.
- In labada dal si wadajir ah uga shaqeeyaan xasilloonida gobolka, gaar ahaan la dagaallanka argagixisada.
Kulammada waxaa lagu xoojiyay farriin rasmi ah oo uu Ra’iisul Wasaaraha Itoobiya, Abiy Ahmed, soo diray, taasoo diiradda lagu saaray xoojinta iskaashiga labada dal. Wasiirka Gaashaandhigga Itoobiya ayaa sidoo kale ku adkeysay muhiimada iskaashiga labada dhinac si loo gaaro nabad iyo horumar waara.
Inkasta oo Dowladda Soomaaliya aysan weli ka soo saarin war rasmi ah oo ku saabsan heshiiskan, horey ayay u sheegtay inay dib u eegis ku sameynayso mowqifkeedii hore ee ka dhanka ahaa ka qaybgalka Itoobiya ee hawlgalka AUSSOM.
Heshiiskan cusub ayaa daba socda booqashadii dhawaan uu wafdi Soomaaliyeed oo uu hoggaaminayay Wasiiru Dowlaha Arrimaha Dibadda, Cali Maxamed Cumar, ku tageen Itoobiya, halkaas oo lagu xoojiyay xiriirka labada dal iyo bayaankii Ankara ee iskaashiga labada dhinac.
Su’aalaha Taagan:
Dadka falanqeeya arrimaha siyaasadda ayaa isweydiinaya haddii heshiiskan uu macnaheedu yahay in Soomaaliya ay ogolaatay ka qaybgalka Itoobiya ee AUSSOM. Wali lama oga go’aanka rasmiga ah ee Dowladda Soomaaliya ee arrintan ku saabsan, iyadoo la filayo in faahfaahin dheeraad ah laga helo maalmaha soo socda.
Wararka Cusub iyo Faallooyinka Xiisaha Leh Kala Soco Bogga!
