Ankara (Dawan)- Wasiirka Difaaca Jabuuti, Xasan Cumar Maxamed oo booqasho rasmi ah ku jooga dalka Turkiga ayaa la kulmay dhiggiisa dalkaas, Yaşar Güler, iyada oo labada Wasiir ay kawada hadleen sidii loo xoojin laha xiriirka labada dal ee dhinaca ciidanka.
“Wasiirka Difaaca Qaranka Yaşar Güler ayaa si rasmi ah u soo dhaweeyay Wasiirka Difaaca Qaranka Jabuuti Xasan Cumar Maxamed, oo booqasho rasmi ah ku yimid Ankara, iyada oo loo sameeyay munaasabad soo dhaweyn ah. Labada Wasiir waxa ay wada yeesheen kulan laba geesood ah,” ayaa lagu yiri, qoraal lasoo dhigay Barta X ee Wasaaradda Difaaca Turkiga.
Kulanka kadib, waxa ay Labada dhinac kala saxiixdeen dhowr heshiis ah oo isagu jira Heshiiska Iskaashiga Tababarka Ciidanka, Heshiiska Iskaashiga Maaliyadeed ee Milatariga iyo Hab-maamuuska Dhaqangelinta Kaalmada Lacageed.
Iskaashiga Jabuuti iyo Turkiga
Shirkii shanaad ee Guddiga dhaqaalaha Turkiga iyo Jabuuti ayaa dhawaan ka qabsoomay, iyada oo ay shir gudoomiyeen Wasiirka Gaadiidka iyo kaabayaasha dhaqaalaha ee Turkiga Cabdulqaadir Uraloğlu iyo Wasiirka Arrimaha Dibadda iyo iskaashiga caalamiga ah ee Jabuuti Maxamuud Cali Yuusuf.
Kulanka oo ka dhacay magaalada caasimadda ah ee Jabuuti, ayuu Wasiirka Gaadiidka Turkigu tilmaamay horumraka laga gaaray iskaashiga labada Dowladood tan iyo markii ay is dhaafsadeen furitaanka safaaradaha oo laga joogo muddo toban sano ah.
Wasiirka ayaa sheegay in isweydaarisaga ganacsiga ee labada dal inuu gaaray $500 milyan, isagoo carabka ku adkeeyay baahida loo qabo in lasii kordhiyo mustaqbalka dhaw.
Wasiir Uraloğlu ayaa iftiimiyay muhiimadda ay leedahay goobta juquraafiga ah ee Turkiga iyo fursadda uga bannaan Jabuuti, waxa uuna yiri ” Waxaan xiriir la leenahay wadamo badan oo caalamka ah. Diyaarada Turkish Airlines ayaa duulimaad ku tagtaa 130 wadan iyo 343 goobood. Tani waxay sidoo kale fursad muhiim ah u tahay Jabuuti oo uga faa’iideysan karta in ay caalamka u furanto”
Marka la eego mashaariicda uu Turkigu fuliyo, Uraloğlu waxa uu tilmaamay in dalkiisu uu dhawaan Jabuuti ka hirgeliayay deegaan lagu magacaabo “Aagga Istanbul” iyada oo sidoo kale laga shaqeynayo dhismaha Masjidka Cabdul Xamiid.
Hay’adda Horumarinta Turkiga ee TIKA ayaa sidoo kale qorsheyneysa in ay Jabuuti ka fuliso mashaariicda adeegyada dadweynaha sida Isbitaal, sida uu sheegay Wasiirka Gaadiidka Turkiga.
Maalgashadayaasha Turkiga ayaa ka fuliyay Jabuuti 21 mashruuc oo qiimahoodu dhan yahay $205 milyan, waxeyna qorsheynayaan in ay sii dardargeliyaan maalgashiga iyo mashaariicda ay ka wadaan Jabuuti.
Uraloğlu wuxuu xusay suurtagalnimada ah in la fuliyo mashaariic badan oo aan ku koobnayn dhinaca Gaadiidka, laakiin sidoo kale dhinacyada Beeraha, Tamarta, Kalluumeysiga iyo Xanaanada Xoolaha.
Kulanka ka dib waxa ay labada dhinac kala saxiixdeen 15 heshiisyo is afgarad ah oo heerar kala duwan leh, kuwaas oo isagu jira dhinacyada Beeraha, Dalxiiska, Deegaanka iyo Kalluumeysiga.
Biya-Xireenka Ambouli
Dhanka kale, Wasiirka Gaadiidka Turkiga oo dhawaan booqday Jabuuti ayaa ka qeyb galay munaasabd xariga loo jaray biya-xireenka Ambouli oo ay hirgelisay Dowladda Turkiga si xal waara loogu helo dhibaatooyinka ka dhasha daadadka xilliyada ay da’aan roobabka mahiigaanka ah.
Wasiirka Beeraha, Biyaha iyo Xannaanada Xoolaha ee dalka Jabuuti, Maxamed Axmed Cawaale, ayaa uga mahad-celiyay Turkiga iyo madaxweynahooda Recep Tayyip Erdoğan hirgelinta biyo-xireenkan oo waxtar ballaaran u leh caasimadda Jabuuti.
Wasiirka oo sharraxaad ka bixiyay biya-xireenka ayaa sheegay in dhererkiisu yahay 394 Mitir, joogiisuna uu dhan yahay ilaa 60 Mitir, waxaana uu sheegay in ujeedka ugu weyn uu yahay sidii Caasimadda looga ilaalin lahaa masiibooyinka fatahaadaha.
Cawaale waxa uu xusay in mashruuca biyo-xireeeenku uu bilaabmay bishii August ee sannadkii 2017-kii, lana dhameeyay bishii June ee sannadkii 2020-ka, isaga oo qaadi kara 14 milyan oo mitir kuyuub ah.
Waxa uu intaas raaciyay in biyo-xireenkan uu ka hortagay dhammaan fatahaadihii dhacay tan iyo markii la dhisay, isla markaana aysan caasimaddu la kulmin daadad xoogan, isagoo mahadcelin ballaaran u jeediyay Dowladda Turkiga iyo hoggaanka guud ee arrimaha biyaha oo dhisay biyo-xireenkan.
