Riyaad (Dawan)- Wasiirka Ganacsiga iyo Dalxiiska Jabuuti, Maxamed Warsame Diiriye, safiirka Jabuuti u fadhiya Sacuudiga,Diyaa’udiin Baamakhrama iyo Agaasimaha guud ee wakaaladda Dalxiiska Jabuuti, Cismaan Cabdi ayaa magaalada Riyaad uga qeyb galay shir calami ah oo loogu talagalay Maalinta Dalxiiska Adduunka.
Shirkaan oo halku dhig looga dhigay Dalxiiska iyo Maalgashiga cagaaran, waxaa kasoo qeyb galay mas’uuliyiin iyo xeeldheerayaal Dalxiis oo ka badan 500 oo qof kuwaas oo ka kala socday 120 dowladood.
Wasiirka ayaa tilmaamay ahmiyadda uu Dalxiisku u leeahay isdhaxgalka bulshada iyo barashada dhaqamadood, isaga oo sheegay in Jabuuti ay siiso ahmiyad gaar ah goobaha taarikhiga iyo kuwa dabiiciga ah ee loosoo Dalxiis tago.
Wasiirka ayaa sidoo kale kulamo gaargaar ah la qaatay mas’uuliyiinta kasoo qeybgashay shirka, isaga oo kala hadalay sidiii la isaga kaashan lahaa xoojinta iyo kor u qaadista Dalxiiska iyo maalgelintiisa.
Magaalada Riyaad ee caasimadda Boqortooyada Sacuudi Carabiya ayaa isbuucaan martigelisay shirka maalinta Dalxiiska Adduunka iyada oo dowladda Sacuudigu gelisay dadaal dheeraad ah sannadihii ugu dambeeyay arrimaha Dalxiiska.
