Soomaaliya ayaa si rasmi ah ugu fariisatay kursiga aan joogtada ahayn ee Golaha Ammaanka ee Qaramada Midoobay (UNSC) ee sanadaha 2025-2026, taasoo ka dhigan soo laabashadeeda hay’addan caalamiga ah markii ugu horreysay muddo 54 sano ah.
Soomaaliya waxay ku biirtay Denmark, Giriigga, Pakistan, iyo Panama, iyagoo isla markaana wada qaatay xubinnimada cusub ee Golaha Ammaanka. Soomaaliya ayaa kursiga Afrika kala wareegtay Mozambique, waxayna matalaysaa qaaradda Afrika oo ay ku wehliyaan Algeria iyo Sierra Leone.
Doorashadii Soomaaliya ee Golaha Ammaanka ee dhacday 6-dii Juun 2024 ayaa loo arkay guul weyn oo muujinaysa horumarka dhinacyada nabadda iyo xasilloonida ee dalka laga sameeyey sanado colaado ah kadib. Wakiilka Joogtada ah ee Soomaaliya u fadhiya QM, Abuukar Cismaan (Baale), ayaa yiri:
“Waa sharaf weyn in aan matalno Soomaaliya anagoo si rasmi ah u qabanayna booska Golaha Ammaanka ee Qaramada Midoobay. Waxaan diyaar u nahay in aan qaadno mas’uuliyadda ilaalinta nabadda iyo amniga caalamka.”
Caqabadaha Horyaalla
Fariisashada Soomaaliya ee Golaha Ammaanka ayaa ku soo aaday xilli dalka uu wajahayo caqabado, gaar ahaan howlgalka cusub ee AUSSOM oo lagu wado inuu beddelo ATMIS bisha Janaayo 2025. Mid ka mid ah caqabadaha ugu waaweyn ee howlgalkaas waa in weli aan la helin ballanqaadka dhaqaalaha deeq-bixiyeyaasha caalamiga ah.
Fursadaha Soomaaliya
Xubinnimada Golaha Ammaanka ayaa u oggolaan doonta Soomaaliya inay si firfircoon uga qayb qaadato doodaha muhiimka ah ee caalamka, oo ay ku jiraan xallinta khilaafaadka, nabad-ilaalinta, iyo amniga caalamka. Waxaa sidoo kale laga filayaa inay kor u qaaddo iskaashiga gobolka, gaar ahaan la dagaallanka Al-Shabaab iyo sugidda amniga badda.
Iyadoo ay la jirto Algeria iyo Sierra Leone, Soomaaliya ayaa la filayaa inay xoojiso codka Afrika ee Golaha Ammaanka, iyadoo u doodaysa danaha qaaradda iyo xalinta caqabadaha caalamiga ah.
