Hargeysa (Dawan)- Guddiga Doorashooyinka Somaliland ayaa soo saaray qorshe-hawleed faahfaahsan oo ku saabsan cabashooyinka soo saarista natiijooyinka doorashada madaxtinimada iyo doorashada xisbiyada siyaasadda.
Sida lagu sheegay war-saxaafadeed Gudiga uu soo saaray ayaa faahfaahiyay habka loo maareynayo cabashada natiijooyinka doorashada heer degmo, heer gobol, iyo heer qaran, iyadoo xoogga la saarayo hufnaanta iyo raacitaanka shuruucda doorasho ee ku cad Xeerka Doorashada.
Guddiga wuxuu sheegay in xafiisyada degmooyinka ay mas’uul ka yihiin tirinta codadka laga soo aruuriyay goobaha cod-bixinta isla markaana soo gudbiyaan natiijooyinka hordhaca ah ee degmooyinka oo loo gudbiyo xafiisyada doorashada ee heer gobol. Marka cabashooyinka la xalliyo, natiijooyinka ayaa la xaqiijin doonaa waxaana loo gudbin doonaa heer gobol.
Xafiisyada gobollada ayaa la isugu gayn doona natiijooyinka degmooyinka, iyagoo hubinaya saxnaanta iyo wax ka qabashada cabashooyinka laga keenay iyada oo ay wakiillo ka socda xisbiyada siyaasadeed iyo kormeerayaal doorasho goob joog ka yihiin. Natiijooyinka la xaqiijiyay ayaa markaas la soo gudbin doonaa xafiiska dhexe ee Komishinka doorashooyinka Somaliland.
Komishinka doorashooyinka Somaliland ayaa soo ururin doona natiijooyinka laga soo gudbiyay gobollada oo dhan. Marka la xaqiijiyo, natiijooyinka ugu dambeeysa ee doorashada madaxtinimada iyo xisbiyada ayaa lagu dhawaaqi doonaa, waxaana loo gudbin doonaa Maxkamadda Sare si loo xaqiijiyo natiijooyinka rasmiga ah.
War-saxaafadeedka Komishinka doorashooyinka Somaliland wuxuu sidoo kale ka warbixinayay habraaca cabashooyinka ku saabsan natiijooyinka doorashada. Xisbiyada ama musharraxiinta doonaya inay cabasho ka gudbiyaan natiijooyinka waxay haystaan ilaa toddoba maalmood oo ay cabashooyinkooda ugu gudbiyaan Maxkamadda Sare, taas oo dib u eegis ku sameyn doonta cabashooyinkaas muddo cayiman, si loo hubiyo in hannaanka doorashada uu ahaa mid caddaalad ah oo hufan.
