Masar (Dawan) – Ugu yaraan saddex qof ayaa ku dhintay, 94 kalena waa ay ku dhaawacmeen maanta oo Sabti kadib markii tareen rakaab ah uu ka baxay wadada gobolka Matrouh ee waqooyiga Masar, sida ay sheegtay Wasaaradda Caafimaadka.
Hay’adda Tareennada Qaranka ayaa sheegtay in shilku dhacay abaare 3:30 duhurnimo waqtiga maxalliga Masar, markii toddobo gaari oo tareen ah oo ka soo baxay magaalada xeebta ah ee Marsa Matrouh kuna sii jeeday Qaahira ay ka leexdeen wadada. Laba ka mid ah gaadiidka ayaa rogmaday, waxaana rakaab badan ku xayirmay gudaha, taas oo argagax iyo jahwareer dhalisay.
Kooxaha gurmadka degdegga ah ayaa gaaray goobta si ay u saaraan burburka islamarkaana dib loogu furo adeega tareenka. Wasaaradda Gaadiidka ayaa ku dhawaaqday in baaritaan degdeg ah lagu sameynayo sababta shilka, iyadoo sheegtay in cid kasta oo lagu helo mas’uuliyadda shilka la kulmi doonto ciqaab adag.
Isbitaallada ku yaalla Matrouh iyo gobollada deriska ah ayaa lagu wargeliyay feejignaan sare, waxaana goobaha caafimaadka loo diray kooxo caafimaad oo dheeraad ah si ay qeyb uga noqdaan daaweynta dhaawacyada.
Shilalka tareennada ayaa si joogto ah uga dhaca Masar, halkaas oo dayacaad iyo qalab duqoobay ay horey u sababeen musiibooyin badan. Si kastaba ha ahaatee, dowladda Masar ayaa sannadihii u dambeeyay malaayiin doollar ku bixisay casriyeynta shabakadda tareennada, oo ka mid ah kuwa ugu fac weyn Bariga Dhexe.
Mas’uuliyiinta Masar waxay sheegeen in xog dheeraad ah la bixin doono inta ka dib baaritaanadda socdo.
