Ankara (Dawan)- Maanta waxaa magaalada Istanbul laga soo sagootiyay Markabka ay Turkidu ugu talagashay inay xeebaha Soomaaliya uga baarto shidaalka.
Tillaabadan ayaa looga gol-leeyahay higelinta heshiiskii ay labada dowladood kala saxiixdeen bishii March ee lasoo dhaafay ee kusaabsanaa sahminta, qiimeynta, horumarinta iyo soo saarista shidaalka badda Soomaaliya.
Madaxweyne Recep Tayyip Erdoğan, Wasiirka Wasaaradda Batroolka iyo Macdanta Soomaaliya Cabdirisaaq Cumar Maxamed, Wasiirka Tamarta iyo Khayraadka Dabiiciga ah ee Turkiga Alparslan Bayraktar iyo Gudoomiyaha Hay’adda Batroolka Soomaaliya ayaa ka qeybgalay xaflad sagootin ah oo loo sameeyay markabka Oruç Reis.
Markabku waxa uu baaris ka samayn doona ilaa seddex goobood oo middiiba dhantahay 5,000 kiiloomitir oo laba jibaaran muddo todobo bilood ah, waxaana la socda maraakiib kale oo dagaal.
Maxaan ka naqaanaa markabka Oruç Reis?
Markabka sameynaya shidaal baarsita, waxaa lagu magacaaba Oruç Reis, oo samayntiisa la billaabay sannadkii 2012, waxa uuna si rasmi ah u shaqa galay bishii March ee sanadkii 2015.
Marakabka Oruç Reis ayaa howshisii ugu horeysay ee sahminta shidaalka ka sameeyay badda Mediterranean-ka sanakii 2017.
Dhirirkiisu waxa uu dhan yahay 87 mitir halka ballaciisa lagu sheegay 23 mitir , waxa uuna hore uga fuliyay badda Marmara iyo Black Sea hawlgalo sahamin ah.
Oruç Reis waa mid ka mid ah maraakiibta lixda ah ee dunida ka sameysa cilmi-baarista kala duwan ee dhinacayda shidaalka, waxaana ku xiran qalab casri ah oo laga maamuli karo meel fog.
Howlihiisa waxaa ka mid ah sahminta shidaalka, gaaska dabiiciga ah iyo macdanta, la socoshada gunta hoose ee badda, baarista dhul-gariirka, fiilooyiinka la marisooyo badda hoosteeda iyo ogaanshaha wasakhowga badda iyo isbedelka cimilada.
