Khartoum (Dawan)- Madaxa Golaha Sare ee Suudaan, General Abdel Fattah al-Burhan, ayaa Isniintii magaalada Khartoum ku qaabilay Wasiirka Arrimaha Dibadda ee Jabuuti, Maxamuud Cali Yuusuf, si ay uga wada hadlaan suurtagalnimada dib ugu soo noqoshada Suudaan ee Urur goboleedka bariga Afrika ee (IGAD).
Kulankan ayaa yimid kadib markii Suudaan ay hakisay xubinnimadeeda IGAD bishii Janaayo 2023, sababo la xiriira wadahadallada ururka ee uu la yeeshay hogaamiyaha ciidanka RSF, Mohamed Hamdan Daglo.
Wasiirka Arrimaha Dibadda ee Jabuuti ayaa kulankaas u gudbiyay General Burhan warqad ka socota Madaxweynaha Jabuuti, Ismaaciil Cumar Geelle, oo ah guddoomiyaha IGAD ee hadda, warqaddan ayaana diiradda saareysay xiriirka labada dal iyo fursadaha iskaashi ee mustaqbalka.
Wasiirka Arrimaha Dibadda ee Suudaan, Xuseen Awad, ayaa sheegay in kulanku uu diiradda saaray sidii Suudaan ay dib ugu soo noqon lahayd IGAD, isagoo xusay in sidoo kale laga hadlayay khaladaadka IGAD ee la xiriira maaraynta xiisadda Suudaan. Wasiirka ayaa adkeeyay in la kala saaro xiriirka Jabuuti iyo Suudaan iyo xiriirka Suudaan iyo IGAD, ilaa ururka uu qaado tallaabooyin wax-ka-beddelid ah oo la xiriira khaladaadkii dhacay.
Sida laga soo xigtay Awad, warqadda Madaxweyne Geelle ayaa muujisay rajo ku aaddan in Suudaan ay dib ugu soo laabato xubinnimadeeda IGAD, iyadoo ururku diyaar u yahay sii wadista wada shaqeynta. Wasiirka Arrimaha Dibadda ee Jabuuti, Maxamuud Cali Yuusuf, ayaa sheegay in booqashadiisu ay ahayd dhiirrigelinta Suudaan si ay dib ugu soo ceshato doorkeedii firfircoon ee IGAD, wuxuuna xusay in Jabuuti ay ka xun tahay dhibaatada ka dhalatay dagaalka Suudaan ee u dhexeeya ciidamada dowladda iyo RSF.
Dagaalka u dhexeeya ciidamada Suudaan iyo RSF ayaa billowday bishii Abriil 2023, waxaana uu sababay burbur baahsan, dhibaato bani’aadamnimo, iyo barakac ballaaran oo ka dhacay dalka Suudaan. Jabuuti ayaa balanqaaday inay la socon doonto xaaladda Suudaan iyada oo ku baaqaysa nabad iyo xasilooni.
