MUQDISHO, Soomaaliya – Hoggaamiyaha Dawlad Goboleedka SSC-Khaatumo, Cabdiqaadir Axmed Aw-Cali, ayaa booqasho shaqo ku tagay safaaradda Shiinaha ee magaalada Muqdisho, halkaas oo uu kulan rasmi ah kula yeeshay Danjiraha Shiinaha u fadhiya Soomaaliya, Wang Yi.
Kulankan oo ay warbaahinta SSC-Khaatumo soo bandhigtay 17 May 2025 ayaa lagu sheegay in labada dhinac ay si qoto dheer uga wada hadleen sidii loo xoojin lahaa xiriirka taariikhiga ah ee ka dhexeeya Soomaaliya iyo Shiinaha, iyadoo si gaar ah diiradda loo saaray dardargelinta iskaashiga horumarineed ee gobolka SSC-Khaatumo iyo guud ahaan dalka.
“Labada masuul waxay si weyn isaga xog-waraysteen xiriirka qotada dheer ee ka dhexeeya labada dal ee Soomaaliya iyo Shiinaha,” ayaa lagu yiri war-saxaafadeed ka soo baxay Madaxtooyada SSC-Khaatumo.
Danjire Wang Yi ayaa dhankiisa muujiyay sida ay dowladda Shiinaha uga go’an tahay hirgelinta mashaariic horumarineed oo waaweyn, kuwaas oo la raacayo heshiisyadii horey u dhexmaray Soomaaliya iyo Shiinaha iyo natiijooyinkii ka soo baxay Madasha Iskaashiga Shiinaha iyo Afrika (FOCAC). Wuxuu xusay in mashaariicdaasi ay si toos ah u taaban doonaan nolosha bulshada Soomaaliyeed, gaar ahaan dadka ku dhaqan SSC-Khaatumo.
Hoggaamiye Cabdiqaadir Aw-Cali ayaa uga mahadceliyay danjiraha Shiinaha soo dhaweynta diirran iyo ballanqaadka taageerada, wuxuuna bogaadiyay kaalinta muhiimka ah ee Shiinaha kaga jiro dib-u-dhiska, horumarinta kaabeyaasha dhaqaalaha, iyo taageerada dowlad-dhisidda Soomaaliya.
