Jigjiga (Dawan) – Madaxweynaha Dowlad Deegaanka Soomaalida (DDS), Mustafe Muxumed Cumar, ayaa si rasmi ah u bilaabay barnaamijka shaqooyinka tabarucaadka ee xagaaga ee sanadka 2025. Barnaamijkan, oo qayb ka ah dadaallada qaran, waxa uu ujeedkiisu yahay bixinta adeegyo muhiim ah iyo hagaajinta xaaladaha nololeed ee dadka ugu nugul deegaanada.
Madaxweynaha Mustafe Muxumed Cumar ayaa sheegay in barnaamijkan uu xoogga saarayo horumarinta dadka, isagoo si gaar ah u tilmaamay in barnaamijkan ay ka faa’iideysan doonaan bulshooyinka deegaanka. Madaxweyne Mustafe ayaa ku boorriyey dhammaan shacabka deegaanka inay si firfircoon uga qeyb qaataan barnaamijka, isla markaana fahmaan faa’iidada uu leeyahay.
“Shacabka waxaan fareenaa inay ka qeyb qaataan, oo ay fahmaan faa’iidada Barnaamijkaan leeyahay. Meel walbo aan xooggeena wax ku qabanno annagoo gudbinayna farriinta ah yaan dowladda uun wax laga sugin,” ayuu yiri Madaxweyne Mustafe.
Barnaamijkan xagaaga waxaa ka mid ah dhowr howlaha bulshada lagu horumarinayo, kuwaas oo kala ah:
- Cagaarinta Dhaxal-reebka cagaaran: Si loo hagaajiyo deegaanka iyo kor u qaadista dhaqanka waara.
- Bixinta dhiigga: Si loogu caawiyo adeegyada caafimaadka iyo in la helo sahay dhiig oo joogto ah.
- Adeegyada caafimaadka: Waxaa ka mid ah baaritaannada kansarka qoorta iyo naasaha, sonkorowga, TB, iyo dhiig karka.
- Bixinta agabka waxbarashada: Si loo hubiyo in ardayda helaan qalabka ay ugu baahan yihiin waxbarashadooda.
- Dhismaha iyo dayactirka guryaha: Si loo caawiyo qoysaska saboolka ah ee ku nool deegaanka.
- Hawlaha ciyaaraha: Si loogu dhiirrigeliyo bulshada inay ka qeyb qaataan jimicsiga iyo caafimaadka.
- Ololayaasha wacyigelinta dadweynaha: Ku saabsan caafimaadka, joogtaynta deegaanka, iyo daryeelka bulshada.
Madaxweynaha Mustafe ayaa shacabka ku boorriyey inay si firfircoon uga qeyb qaataan, isagoo sheegay in dadaalka wadajirka ah uu kaalin weyn ka qaadan doono horumarinta iyo waaraanta deegaanka.
