Hay’adda Sirdoonka iyo Nabadsugidda Qaranka (NISA) ayaa shaacisay in ay howlgallo qorsheysan oo ay ka fulisay deegaanno kala duwan oo ka tirsan gobolka Shabeellaha Dhexe, lagu dilay 13 xubnood oo ka tirsanaa alshabaab, kuwaas oo qaar kamida ay horjoogayaal ahaayeen.
War-saxaafadeed ay hay’addu soo saartay ayaa lagu sheegay in howlgalladu ka kala dhaceen deegaannada Qoordheere, Xawaala-kulan, Reydableey iyo buurta Ceelbaraf, iyadoo lagu beegsaday xubno ay NISA ku sheegtay in ay qorsheynayeen maalmihii udanbeeyay falal amni-darro.
Howlgalka deegaanka Qoordheere oo hoos taga degmada Raagaceelle ayaa lagu sheegay in lagu dilay afar xubnood, iyadoo la burburiyay teendhooyin iyo keyd hub ah. Sidoo kale, howlgal laga sameeyay inta u dhaxeysa Xawaala-kulan iyo Reydableey ayaa lagu sheegay in lagu dilay shan xubnood.
Dhinaca kale, afar xubnood oo kale ayaa lag usheegay war saxaafadeedka in lagu dilay buurta Ceelbaraf, halkaas oo NISA ay tilmaamtay in lagu maleegayay falal amniga lid ku ah
Howlgaladaan ayaa ku soo aadaya xilli ciidamada dowladda Soomaaliya oo garab ka helaya kuwa deegaanka iyo Alshabaab ay muddooyinkii dambe dagaallo culus ku dhexmarayeen gobolka Shabeellaha Dhexe.
