Muqdisho (Dawan ) – Shirkadda Hormuud Telecom ayaa maanta ku dhawaaqday in adeeggeeda EVC Plus mar kale la siiyay Shahaadada Adeegyada Maaliyadeed ee Moobeelka (GSMA) ee Ururka Isgaarsiinta Moobeellada Adduunka.
Shahaadadan oo uu bixiyay Certi-Trust kadib kormeer lagu sameeyay intii u dhaxeysay 27-kii Juun iyo 22-kii Luulyo 2025, ayaa ansax ahaan doonta muddo saddex sano ah illaa 24-ka Luulyo 2028. Tani waxay EVC Plus ka dhigtay mid ka mid ah toban adeeg lacag dhijitaal ah oo keliya caalamka oo gaarhay heerkan, taas oo muujinaysa isbadelka Soomaaliya ka sameyneyso nidaamka maaliyadeed ee danabeysan
Sida lagu sheegay Ururka Isgaarsiinta Moobeellada Adduunka (GSMA), shahaadadan waxaa la siiyaa oo keliya adeeg bixiyeyaasha muujin kara u hoggaansanaan adag oo ku saabsan ilaalinta macaamiisha, amniga, ka hortagga lacag dhaqidda sharci darrada ah iyo hufnaanta hawlgalka.
Hormuud ayaa markii ugu horreysay heshay shahaadadan 25-kii Maarso 2022, taas oo ka dhigtay EVC Plus adeegii ugu horreeyay ee Soomaaliya ku guuleysta aqoonsigan caalamiga ah.
Cusbooneysiinta hadda la siiyay ayaa muujinaysa in shirkaddu sii waddo la jaanqaadka heerarka caalamiga ah.
“Guusha Hormuud Telecom ma aha oo keliya guul shirkadda u gaar ah, balse waa aqoonsi ku wajahan kaalinta sii kordheysa ee Soomaaliya ee dhaqaalaha danabeysan ee caalamka,” ayaa lagu yiri bayaan shirkaddu soo saartay. “Tani waa guul u dhalatay mustaqbalka dhijitaalka ah ee Soomaaliya.”
Adeegga EVC Plus, oo la bilaabay sanadkii 2011, ayaa noqday adeegga lacagta danabeysan ee ugu isticmaalka badan Soomaaliya, iyadoo malaayiin qof u suuragelisa inay sameeyaan wax kala beddelasho lacag la’aan ah gudaha dalka, halkaas oo kaabayaasha bangiyada dhaqameed ay weli xaddidan yihiin.
Adeeggan ayaa laf-dhabar u noqday ganacsiga dalka, nolol-maalmeedka qoysaska, iyo barnaamijyada lacagaha gargaarka, taas oo ka dhigaysa aalad muhiim u ah ballaarinta ka mid noqoshada maaliyadeed.
