MUQDISHO (Dawan) – Madaxweynaha Jamhuuriyadda Federaalka Soomaaliya Xasan Sheekh Maxamuud ayaa ka qeybgeli doona kalfadhiga 80aad ee Golaha Guud ee Qaramada Midoobay (UNGA), kaas oo furmaya 9ka Sebtembar 2025 xarunta Qaramada Midoobay ee magaalada New York, sida ay sheegeen ilo diblomaasiyadeed oo la hadlay Dawan Africa.
Inkasta oo kalfadhigu si rasmi ah u furmi doono 9ka Sebtembar, doodda heerka sare ee madaxda dalalka oo ah qeybta ugu muhiimsan UNGA ayaa bilaaban doonta 23ka Sebtembar. Madaxweyne Xasan ayaa lagu wadaa inuu khudbad ka jeediyo, taas oo noqonaysa markii labaad ee uu UNGA ka hadlo tan iyo markii uu dib ugu soo noqday xafiiska bishii Maajo 2022.
Kalfadhigan ayaa halku dhiggiisu yahay “Wadajir ayaa wanaag badan: 80 sano iyo wixii ka dambeeya nabadda, horumarka iyo xuquuqda aadanaha.” Shirku wuxuu kusoo beegmayaa xilli muhiim ah oo lagu cusboonaysiinayo ballanqaadka caalamiga ah ee ku aaddan wadajirka, garab istaagga, iyo tallaabo wadajir ah
Golaha Guud ee Qaramada Midoobay (UNGA) waa hay’adda ugu weyn ee go’aan dejinta siyaasadda ee ururka. Isagoo ka kooban dhammaan dalalka xubnaha ka ah, wuxuu bixiyaa madal gaar ah oo lagu falanqeeyo arrimaha caalamiga ah ee lagu qeexay Axdiga Qaramada Midoobay. 193-da dal ee xubnaha ka ah waxay leeyihiin cod siman.
Qaramada Midoobay lafteeda waxaa la aasaasay 1945, ka dib Dagaalkii Labaad ee Adduunka. Maanta waxa ay mideysaa 193 dal xubin ka ah, waxaana hagaya ujeeddooyinka iyo mabaadi’da ku xusan Axdiga aasaaska, iyadoo u adeegaysa nabadda, horumarka, iyo xuquuqda aadanaha guud ahaan dunida.
, isagoo khudbad ka jeedin doona magaalada New York 23ka Sebtembar.){kind=link}