Kampala, Uganda – Waxaa si rasmi ah loo xaqiijiyay in shir muhiim ah oo ay isugu imaan doonaan hoggaamiyeyaasha waddamada ciidamadoodu ka qaybqaataan Hawlgalka Taageerada iyo Xasillinta Midowga Afrika ee Soomaaliya (AUSSOM) uu ka qabsoomi doono magaalada Kampala, Uganda, 25-ka Abriil 2025.
Kulankaan ayaa lagu xaqiijiyay war-saxaafadeed wadajir ah oo kasoo baxay booqashada rasmi ah ee Madaxweynaha Soomaaliya ee dalka Uganda 5-tii Abriil 2025. Intii uu booqashadu socotay, madaxda labada dal ayaa si weyn uga hadashay muhiimada shirka, iyagoo soo jeediyay baahida wada-shaqeyn dheeri ah ee madaxda dowladaha iyo xukuumadaha si loo xalliyo khataraha amni ee ay kooxaha Al-Shabaab iyo Daacish Soomaaliya ku hayaan.
“Madaxda dalalka ayaa hoosta ka xariiqay muhiimada shirka wadamada ciidamadooda ka qeyb qaata ee lagu qorsheeyay 25-ka Abriil 2025. Waxay sidoo kale xuseen muhiimada madaxda dowladaha iyo xukuumadaha inay si wadajir ah uga shaqeeyaan sidii looga hortagi lahaa khatarta argagixisada ee Soomaaliya.” ayaa lagu yiri warsaxaafadeedka
Shirkan ayaa imanaya xilli muhiim ah oo amniga Soomaaliya ah, iyadoo Ciidanka Xoogga Dalka Soomaaliyeed (SNA) iyo ciidamadda Midowga Afrika ay dhawaan la kulmeen caqabado waaweyn dagaalka ay kula jiraan Al-Shabaab. Horumarinta xaaladdan ayaa dad badani u arkaan inay muujineyso baahida loo qabo tallaabooyin isku-duuban iyo taageero xooggan oo loo fidiyo dowladda Soomaaliya si loo xoojiyo nabadda iyo dagaalka ka dhanka ah kooxaha Alshaab iyo Daacish.
Shirka ayaa sidoo kale looga wada hadli doonaa maalgelinta Hawlgalka Taageerada iyo Xasilinta Midowga Afrika ee Soomaaliya (AUSSOM), kadib markii Mareykanku diiday maalgelinta dheeraadka ah ee hawlgalkan. Sidoo kale, Midowga Yurub uu wajahayo caqabado dhaqaale oo la xiriira dagaalka Ukraine. Sidaas awgeed, dalalka AUSSOM waxay u baahan doonaan inay ka wada tashadaan xalinta sidii loo hubin lahaa in hawlgalku helo taageero ku filan.
Dalalka xubnaha ka ah Midowga Afrika ee ciidamo u soo diray hawlgalkan waxaa ka mid ah:
- Uganda: 4,500 askari
- Kenya: 1,410 askari
- Itoobiya: 2,500 askari
- Jabuuti: 1,520 askari
- Masar: 1,091 askari
Hawlgalka AUSSOM ayaa la filayaa in ciidamadu sii joogaan Soomaaliya ilaa 31-ka Juun 2025, qaybta koowaad ee hawlgalkan. Marka taariikhdaas la gaadho, 440 askari ayaa laga soo dhaweeyn doonaa. Qaybta labaad ee hawlgalkan, oo bilaabmi doonta 1-da Luulyo 2025, waxaa la qorsheynayaa in lagu soodaro 11,146 askari ilaa 31-ka Diseembar 2025. Qorshaha hawlgalkan ayaa la filayaa in laga saaro Soomaaliya dhamaadka 2029, iyadoo ay saameyn ku yeelan karto xaaladda amni iyo qiimeynta farsamo ee la socota.
Hawlgalka Midowga Afrika ee Soomaaliya ayaa ka howlggei doona deegaano kala duwan, waxaana loo qaybiyey qaybaha soo socda:
- Qaybta Koowaad: Gobolka Banadir, oo ay ku jirto Muqdisho iyo qaybo ka mid ah Shabeellaha Hoose
- Qaybta Labaad: Gobolka Shabeellaha Hoose, Juba Hoose, Juba Dhexe, iyo Gedo, oo xarunteedu tahay Kismayo iyo saldhigyo Dhobley ah
- Qaybta Saddexaad: Gobollada Bay, Bakool, iyo Gedo
- Qaybta Afraad: Gobollada Hiraan iyo Galgaduud
- Qaybta Shanaad: Gobolka Shabeellaha Dhexe, oo saldhig weyn uu ku yaal Jowhar
Shirkaan ayaa siin doona hoggaamiyeyaasha fursad ay ku qiimeeyaan horumarka hawlgalka, uga wada hadlaan caqabadaha soo kordhay, iyo tallaabooyinka loo baahan yahay si loo xaqiijiyo in yoolalka Hawlgalka Midowga Afrika ee Soomaaliya (AUSSOM) lagu guuleysto.
