Muqdisho (Dawan ) – Ra’iisul Wasaarihii hore ee Soomaaliya, Cumar Cabdiraashid Cali Sharmaarke, ayaa ugu baaqay Puntland inay si degdeg ah u soo deyso markabka MV Sea World, kadib kulan uu la yeeshay Safiirka Turkiga ee Soomaaliya, sida uu sheegay.
Sharmarke ayaa bartiisa X ku sheegay maanta in safiirka Turkiga uu kala hadlay, isla markaana uu xaqiijiyey in markabka uu waday qalab millateri oo loogu talagalay TURKISOM, sidoo kale safiirka uu kala xiriiray Puntland, balse aysan helin wax jawaab ah.
“Shir aan la yeeshay safiirka Turkiga maanta, wuxuu ii sheegay in markabka MV Sea World uu waday qalab millateri oo loogu talagalay TURKISOM. Safiirku wuxuu sheegay in uu isku dayay inuu la xiriiro Puntland, laakiin ma helin wax jawaab ah,” ayuu yiri Omar Abdirashid Ali Sharmarke, waxa uuna intaa ku daray in Puntland ay tahay inay si degdeg ah u sii daayso markabka.
Markabka MV Sea World ayaa la qabtay 18-kii Luulyo 2025, iyadoo Ciidamada Badda Puntland (PMPF) ku qabteen xeebaha Bareda, kadib markii ay ka shakiyeen inuu waday hub aan sharciga waafaqsanayn, sida ay sheegtay Puntland. Puntland ayaa ku andacoonaysa in markabku uu ku dhex wareegayay biyaha Puntland, inkastoo ay qirtay in Turkiga uu si rasmi ah ula soo xiriiray oo uu sheegtay balse ay ku adkeensaneyso inay baareyso markabka.
Si kastaba ha ahaatee, Dowladda Federaalka Soomaaliya waxay sheegaysaa in qalabka markabka ku jira uu yahay qayb ka mid ah xamuul millateri sharci ah oo waafaqsan yahay xeerarka caalamiga ah, iyadoo falka Puntland ay ku kacday uu yahay afduub.
Khilaafka ku saabsan markabka MV Sea World ayaa sare u qaaday xiisadaha u dhexeeya Puntland iyo Dowladda Federaalka, iyadoo labada dhinac ay horey xiriirkooda uusan u wanaagsanaayeen.
TURKISOM (Xarunta Tababarka Millateriga ee Turkiga iyo Soomaaliya), oo ku taalla Muqdisho, ayaa ah xarun lagu tababaro Ciidanka Xoogga Dalka Soomaaliya (SNA), waxaana ay ka mid tahay iskaashiga millateri ee Soomaaliya iyo Turkiga.
