Balad-xaawo(Dawan) – Dagaal u dhexeeya Ciidamada Jubbaland iyo Ciidamada Dowladda Federaalka Soomaaliya ayaa ka bilowday magaalada Beled-Xaawo, ee gobolka Gedo, saakay.
Dagaalka ayaa bilowday kaddib markii Abdirashid Janan, oo ah taliyaha cusub ee NISA ee Gedo, uu subaxnimadii maanta ku gaaray diyaarad magaaladaas, taasoo la socdeen ciidamo.
Jubbaland ayaa sheegtay in dagaalka uu ahaa weerar lagu soo qaaday ciidamada Jubbaland, balse ay iska caabiyeen.
“Haatan magaalada Balad Hawo waxaa gacanta ku haya ciidamada Jubbaland, waxaana gacanta lagu dhigay qaar ka mid ah maleyshiyadii magaalada khal-khal geliyay. Ciidamada Jubbaland ayaa hadda ku daba jira firxadka kuwa kale ee baxsaday, oo uu ka mid yahay Abdirashid Janan, oo saaka helikopter ciidamo ah ku yimid,” ayaa lagu yiri war ka soo baxay Jubbaland TV.
Jubbaland ayaa sidoo kale sheegtay in ciidamada Jubbaland ay gacanta ku hayaan magaalada Balad Hawo.
Dagaalkani wuxuu ka dhacay xilli ay jiraan xiisado sii kordhaya oo u dhaxeeya Dowladda Federaalka Soomaaliya (FGS) iyo ciidamada Jubbaland. Gobolka Gedo, oo ay magaalada Balad Hawo hoos timaado, ayaa noqotay meel ay ka socdaan murano siyaasadeed oo dhexmara dowladda dhexe iyo Jubbaland.
Magacaabista Janan ee taliyaha NISA ee Gedo ayaa sii kordhiyay Khilaafka siyaasadeed ee u dhexeya Dowladda Federaalka iyo Jubbaland. Janan, oo horey u soo noqday Wasiirka Amniga ee Jubbaland, ayaa saameyn weyn ku lahaa gobolka.
Puntland ayaa sidoo kale ka hadashay arrintan, iyadoo eedeysay Dowladda Federaalka inay weerar ku qaadday Beled-Xaawo.
“Talaabooyinka ay qaaday Ra’iisul Wasaare Hamse iyo Madaxweynaha Xasan Sheekh Maxamuud maanta Balad Hawo waa nasiib-darro. Waxaa muhiim ah in xoogga la saaro difaaca gobollada kale sida Hiiraan, halkii laga abuuri lahaa xiisad dheeri ah Balad Hawo,” ayuu yiri mas’uulka Puntland.
Illaa iyo hadda, Dowladda Federaalka Soomaaliya wax jawaab ah kama aysan bixin xaaladda cusub ee ka taagan Gedo.
