Jowhar – Madaxweynaha dowlad-goboleedka Hirshabeelle, Cali Cabdullaahi Xuseen (Cali Guudlaawe), ayaa si kulul u weeraray Xildhibaan Cusmaan Xaadoole, isagoo ku eedeeyay in uu doonayo in isbaarooyin sharci-darro ah lagu dhigo deegaanada Hirshabeelle.
Madaxweynaha xilli uu oo ka hadlayay furayay kal-fadhiga 17-aad ee Baarlamaanka Hirshabeelle, ayuu sheegay in Xildhibaan Xaadoole uu ka leexday waajibaadkiisii dastuuriga ahaa, isla markaana u dhaqmayo sida qof doonaya in uu carqaladeeyo amniga iyo horumarka deegaannada uu matalo.
“Ma jiryo xildhibaanada golaha shacabka nimey isbaaro u taalo dalka soomaaliya, mana jiryo xildhibaan ku haminayo oo xildhibaan cusmaan Xaadoole ahayn. ” ayuu yiri Madaxweyne Guudlaawe.
Eedeymahaan waxay jawaab u yihiin hadal uu horey uga jeediyay Xildhibaan Xaadoole, oo madaxweynaha ku eedeeyay in uusan doonayn in la adkaado Al-Shabaab, gaar ahaan dagaalka ka socda deegaannada Shabeellaha Dhexe. Xaadoole ayaa tilmaamay in madaxweynaha uu yahay caqabad ka hor taagan guusha ciidamada dowladda.
Khilaafka u dhexeeya labada mas’uul ayaa muujinaya kala qeybsanaan siyaasadeed oo ka dhex aloosan madaxda heer gobol iyo kuwa heer federaal.
