Ra’iisul Wasaaraha Itoobiya Abiy Axmed ayaa Khamiistii ku dhawaaqay in dowladdiisu ay heshiis maalgashi oo dhan $2.5 bilyan la gashay shirkadda reer Nayjeeriya ee Dangote Group, si loo dhiso warshad weyn oo bacrimin ah gudaha Itoobiya.
Qoraal uu soo dhigay bartiisa rasmiga ah ee X, Abiy ayaa sheegay in heshiiska dhexmaray Sanduuqa Maalgashiga Itooobiya iyo Dangote Group uu dalka u saamixi doono inuu soo saaro illaa 3 milyan oo tan oo bacrimin ah sanad walba.
“Waxaan bilownay safarkan, waana dhammeystiri doonaa — beeraleyda, dhaqaalaha, iyo mustaqbalka Itoobiya ayaana loogu talagalay,” ayuu Abiy ku qoray bartiisa X.
Ra’iisul Wasaaruhu waxa uu xusay in mashruucu abuuri doono shaqooyin gudaha ah, hubin doono sahay joogto ah oo bacrimin ah oo beeraleydu helaan, isla markaana kor u qaadi doono tartanka Itoobiya ee suuqyada gobolka iyo kuwa caalamiga ah. Wuxuu ku tilmaamay hindisahan inuu yahay tallaabo muhiim ah oo lagu gaari doono isbeddel dhinaca sugnaashaha cuntada iyo horumarinta beeraha. Wuxuuna intaa ku daray in mashruuca si rasmi ah goobta loogu daahfuri doono ka dib saxiixa.
Warbixin ay soo xigatay Qorshaha Istaraatiijiga ah ee AGRA (2023–27), oo ku saleysan xogta Bangiga Qaranka Itoobiya iyo Hay’adda Tirakoobka Qaranka, ayaa tilmaamaysa in beeruhu ka qayb qaataan 32.7% GDP-ga, ay shaqaaleeyaan 65% dadka, isla markaana ay keenaan 77% wax dhoofinta dalka.
Dhanka kale, Warbixinta Saddexdii Bilood ee Dhaqaalaha Itoobiya ee UNDP (Abriil 2025) ayaa muujisay in wax-soo-saarka dhabta ah ee beeraha uu kordhay 7.0% sanadkii 2024, marka loo eego 9.2% warshadaha.
