NAIROBI (Dawan ) – Booliska Kenya ayaa xiray laba haween ah oo Soomaali ah kadib markii ay qabteen lacag Mareykan ah oo boolisku sheegeen inay ahayd been-abuur oo gaareysa $560,000, taas oo u dhiganta ku dhowaad 70 milyan shilin Kenyan, intii lagu guda jiray howlgal amni oo ka dhacay caasimadda.
Sida uu sheegay Agaasinka Baarista Dambiyada Kenya (DCI) maanta, ciidamada xafiiska Nairobi ayaa fuliyay hawlgal qorshaysan kadib xog sirdoon oo la helay, waxayna ku sugnaayeen xaafadda Upper Hill, halkaas oo lagu xiray haweenka oo lagu magacaabo Ifrah Cali Jeyte iyo Qamar Salaat Cabdi.
Waaxda ayaa sheegtay in intii lagu guda jiray baaritaanka la helay xirmooyin lacag $100 ah oo lagu qariyay boorso. Lacagtaas ayaa markii dambe lagu tiriyey xarunta Baarista Dambiyada ee Nairobi, waxaana la xaqiijiyey in tiradeedu gaareyso $560,000.
Labada haween ayaa wali ku jira gacanta booliska, iyadoo baaritaanku socdo, waxaana la sheegay in la horkeeni doono maxkamad marka baaritaannada dhammaadaan.
Waaxda ayaa ugu baaqday shacabka inay sii wadaan warbixinta falalka looga shakiyo dambiyada maaliyadeed iyada oo loo marayo khadadka talo-bixinta ee qarsoon, iyagoo carrabka ku adkeeyay muhiimadda iskaashiga bulshada ee lagu burburinayo shabakadaha lacagaha been-abuurka ah.
