Bangiga Caalamiga ah ee Lacagta (IMF) ayaa muujiyay walaac xooggan oo ku aaddan khatarta dhaqaale ee caalamiga ah ee ka dhalan karta cashuuraha cusub ee uu ku dhawaaqay Madaxweynaha Mareykanka Donald Trump. Agaasimaha Guud ee IMF, Kristalina Georgieva, ayaa Khamiistii sheegtay in cashuurahan cusub ay kordhin karaan hubanti la’aanta isla markaana ay halis gelin karaan dhaqaalaha dunida oo horey u jilicsanaa.
“Wali waxaan ku guda jirnaa qiimeynta saamaynta dhaqaale ee tallaabooyinkan cashuureed, balse si cad waxay u yihiin khatar weyn oo saameyn karta aragtida dhaqaale ee caalamiga ah xilli koboca dhaqaale uu gaabis yahay,” ayay tiri Georgieva.
Hadalkeeda ayaa yimid maalin kadib markii Madaxweyne Trump uu ku dhawaaqay cashuuro adag oo u dhexeeya 10% ilaa 50%, oo lagu soo rogay badeecooyinka laga keeno dalal badan sida Shiinaha (34%), Midowga Yurub (20%), Vietnam (46%), Hindiya (26%) iyo kuwa kale.
Georgieva waxay ugu baaqday Mareykanka iyo saaxiibadiisa ganacsi inay si wadashaqayn leh ku xalliyaan khilaafaadka,
“Waa muhiim in laga fogaado tallaabooyin sii dhaawici kara dhaqaalaha dunida.” Ayay tiri Georgieva
IMF ayaa qorshaynaysa inay faahfaahin dheeraad ah ka bixiso saameynta tallaabooyinkan marka la daabaco Warbixinta Dhaqaalaha Caalamiga ah ee IMF inta lagu jiro Shirarka Guga ee IMF iyo Bangiga Adduunka dabayaaqada bishan.
