Washington, D.C., Mareykanka – Madaxweynaha Mareykanka, Donald Trump, ayaa Arbacadii saxiixay amar madaxweyne oo ku dhawaaqaya canshuur cusub oo ganacsi, oo loo yaqaano “canshuur celis ah”, taasoo saameyn doonta dhammaan dalalka adduunka marka laga reebo Canada iyo Mexico. Ujeeddada canshuurtan ayaa ah in lagu xoojiyo warshadaha gudaha Mareykanka loogana hortago waxa uu Trump ku tilmaamay “khiyaano ganacsi.”
Amarkan cusub wuxuu dhigayaa in canshuur ugu yaraan 10% ah la saaro badeecadaha ka yimaada dhammaan dalalka, iyadoo Türkiye, UK, Kenya, Ethiopia, Lebanon, Togo, iyo dalal kale lagu soo rogay canshuurtan. Si kastaba, Canada iyo Mexico ayaa laga dhaafay canshuurtan maadaama horey loogu ciqaabay arrimo la xiriira socdaalka iyo daroogada fentanyl.
“Maalin muhiim u ah taariikhda Mareykanka… Waa maalintii aan ku dhawaaqnay madaxbannaanideenna dhaqaale,” ayuu yiri Trump. Madaxweynuhu wuxuu intaas ku daray in tallaabadan ay kor u qaadi doonto wax-soo-saarka gudaha, furitaanka suuqyada shisheeyaha, iyo inay sare u qaadi doonto tartanka taasoo keeni doonta in qiimaha badeecadaha la dhimo.
Tan iyo bishii Febraayo, suuqyada maaliyadeed ee Mareykanka ayaa hoos u dhacayey kadib markii Trump shaaciyay qorshahan. Waxaa jira cabsi laga qabo in canshuurtan cusub ay sababi karto sicir-barar, hoos u dhac ganacsi, iyo suurtogalnimada in Mareykanku galo mowjado dhaqaale oo adag.
Guddoomiyaha Midowga Yurub ayaa qorshaha Trump ku tilmaamay “dhirbaaxo culus oo loo geystay dhaqaalaha caalamka,” isagoo ka digay in dhaqaalaha adduunka uu si weyn u dhaawacmi doono haddii qorshahan la hirgeliyo.
