Madaxweynihii hore ee Soomaaliya Maxamed Cabdulaahi Farmaajo ayaa si adag u cambaareeyay xariga Guddoomiyaha Urur-siyaasadeedka Shacabka, Cabdiraxmaan Saleebaan Jaamac.
Farmaajo ayaa war qoraal ah oo uu soo saaray ku sheegay in xarigaas uu muujinayo nooca doorasho ee uu doonayo Madaxweyne Xasan Sheekh Maxamuud iyo hannaanka siyaasadeed ee uu qaatay.
“Xarigga sharci darrada ah ee laamaha ammaanka Soomaaliya ay u geysteen Guddoomiyaha Urur-siyaasadeedka Shacabka, Mudane Cabdiraxmaan Saleebaan Jaamac, waxa uu muujinayaa nooca doorashada ee uu doonayo Madaxweyne Xasan Sheekh Maxamuud iyo hannaanka siyaasadeed ee uu qaatay”,ayaa lagu yiri war kasoo baxay madaxweynihii hore ee Soomaaliya Maxamed Cabdulaahi Farmaajo.
Maxamed Cabdulaahi Farmaajo ayaa sidoo kale sheegay in xariga Guddoomiyaha uu dhibaato u keenayo xasiloonida siyaasadeed iyo hanaanka dimuquraadiyadeed ee dalka.
Ugu dambeyntii, Farmaajo ayaa ugu baaqay Madaxweynaha Soomaaliya Xasan Sheekh Maxamuud inuu si degdeg ah xuriyadiisa u siiyo, isagoo ugu baaqay madaxweynaha inuu cabdiraxmaan Saleebaan Jaamac dib ugu celiyo xuriyadiisa.
Cabdiraxmaan Saleebaan Jaamac, oo ah Guddoomiyaha Urur-siyaasadeedka Shacabka, ayaa xalay waxaa xiray ciidanka Booliska, gaar ahaan Ciidanka saldhiga Xamarweyne, sida uu shaaciyay taliska Booliska Gobolka Banaadir.
Taliska Booliska Gobolka Banaadir ayaa sheegay in Cabdiraxmaan uu ku kacay falal liddi ku ah amniga qaranka, wuxuuna muwaadiniinta kale ku wargaliyay inay ka fogaadaan falalka lidiga ku ah amniga.
