Al Hudaydah, Yemen – Kooxda Xuutiyiinta ee ay Iran taageerto ayaa Isniintii shaacisay in diyaarado dagaal oo Mareykanku leeyahay ay duqeymo ka fuliyeen gobolka galbeed ee Al Hudaydah, gaar ahaan Jasiiradda Kamaran, halkaas oo lagu garaacay laba gantaal. Duqeyntan ayaa ah tii ugu dambeysay ee taxane weerarro ah oo Mareykanku ka fuliyo gudaha Yemen.
Warka duqeynta ayaa markii ugu horreysay lagu baahiyay warbaahinta Al-Masirah, oo ah mid la xiriirta Xuutiyiinta. Warbixinta kama aysan bixin faahfaahin dheeraad ah oo la xiriirta khasaaraha ka dhashay weerarkaasi.
Sida ay sheegtay Wasaaradda Caafimaadka ee Xuutiyiinta, ilaa 60 qof ayaa ku dhintay duqeymaha Mareykanka tan iyo markii uu billowday ol’olaha cirka ah, halka in ka badan 140 kalena ay ku dhaawacmeen, kuwaas oo ay ku jiraan haween iyo carruur.
Madaxweynaha Mareykanka Donald Trump, oo difaacay duqeymahan, ayaa ku tilmaamay “tallaabo militari oo go’aan adag iyo awood leh,” isagoo uga digay Xuutiyiinta inay wajihi doonaan “baabi’in dhammaystiran” haddii ay sii wadaan weerarrada ay ku hayaan maraakiibta ganacsiga.
Tan iyo dhammaadkii 2023, Xuutiyiintu waxay beegsanayeen maraakiib la xiriira Israa’iil oo maraya Badda Cas, Gacanka Cadmeed, iyo Bab al-Mandab, iyagoo adeegsanaya gantaallo iyo diyaarado aan duuliye lahayn. Weerarradoodu waxay sheegeen inay yihiin “garab istaag” shacabka Falastiin ee Gaza, halkaas oo Israa’iil ay wado weerar milatari culus oo sababay dhimashada in ka badan 50,250 qof, sida ay sheegeen ilo caafimaad oo maxalli ah.
Xabad-joojin kooban oo dhacay bishii Janaayo 2025 oo dhex martay Israa’iil iyo Xamaas ayaa keentay in Xuutiyiintu hakaan weerarrada, balse kadib markii dagaalka Gaza dib u billowday, weerarrada Xuutiyiinta ee maraakiibta ganacsiga ayaa si xooggan u soo noqday.
