120 kun oo arday oo ka faa’iideystay deeqaha waxbarasho ee Mandheera

Mandheera, 8 Febraayo 2026 (Dawan) – Ismaamulka Mandheera ee Waqooyi Bari Kenya ayaa shaaciyay in la ballaariyay maalgelinta waxbarashada, kaddib markii uu afartii sano ee ee la soo dhaafay uu bixiyay lacag dhan 1.702 bilyan oo shilin Kiiniya ah, taasoo deeqo waxbarasho ahaan loo siiyay in ka badan 120 kun oo arday.

Sida uu maamulku sheegay, deeqahan waxaa ka faa’iideystay ardayda dhigata dugsiyada sare iyo jaamacadaha, arrintaas oo qayb ka ah siyaasadda maamulka ee lagu hubinayo in duruufaha dhaqaale ee qoysaska inaysan caqabad ku noqon waxbarashada.

Sabtidii, Ismaamulka Mandheera ayaa si rasmi ah u daah-furtay Sanduuqa “Waxbarashada loo dhanyahay "ee sannadka maaliyadeed 2025/2026, iyadoo loo qoondeyay miisaaniyad dhan 450 milyan oo shilin Kenya ah, si loo xoojiyo helitaanka waxbarasho tayo leh.

Mas’uuliyiinta waxbarashada ee Mandheera ayaa sheegay in barnaamijka deeqaha uu illaa hadda taageeray 71,899 arday oo wax ka barta 68 dugsi sare, halka 51,129 arday oo kale ay ka faa’iideysteen jaamacadaha iyo kulliyadaha ku yaalla Ismaamulka, taasoo muujinaysa dadaal joogto ah oo lagu xaqiijinayo in aan carruurta laga xannibin fursadaha waxbarasho.

Intii uu ka hadlayay xafladda daah-furka oo lagu qabtay dugsiga Moi Girls Senior School, Guddoomiyaha Mandheera, Maxamed Khaliifa, ayaa sheegay in barnaamijkan uu yimid xilli xasaasi ah, maadaama abaarta soo noqnoqotay ay saameyn ku yeelatay nolosha qoysas badan, isla markaana khatar gelisay joogtaynta waxbarashada ardayda.

“Marka qoysas badan ay ku dhibtoodaan daboolidda baahiyaha aasaasiga ah, deeqdaan waxay gacan ka geysanaysaa in carruurtu sii wataan waxbarashada, halkii waalidiintu ku khasbanaan lahaayeen inay kala doortaan waxbarasho iyo nolol maalmeed,” ayuu yiri guddoomiyuhu.

Waxa uu intaa ku daray in maalgelinta joogtada ah ee waxbarashada ay durba miro-dhal noqotay, iyadoo xogta Mandheera ay muujisay in 6,869 arday ay u fariisteen imtixaanka u gudbidda fasalka tobnaad, halka 6,743 arday ay ku guuleysteen, taasoo ka dhigan heer gudbid ah 98.2 %.

Guddoomiyaha ayaa xusay in natiijooyinkan ay caddeynayaan in marka la daboolo caqabadaha dhaqaale, isla markaana si dhab ah loo maalgeliyo waxbarashada, in ardaydu ay sii wadaan waxbarashadooda ayna gaaraan guulo muuqda.

Dhinaca kale, Ismaamulka Mandheera ayaa qaaday tallaabooyin lagu xallinayo yaraanta macallimiinta, iyadoo la hawlgeliyay Kulliyadda Tababarka Macallimiinta ee Mandheera si loo dhiso awood waxbarasho oo maxalli ah. Maamulka ayaa sidoo kale bixiyay 50 % khidmadaha waxbarashada ee 1,120 arday oo qaadanaya tababar macallinnimo.

Sidoo kale, Ismaamulka ayaa ballan qaaday inuu si buuxda u daboolo deeqaha waxbarasho ee dhammaan ardayda ka diiwaangashan kulliyadda, si aanay caqabado dhaqaale u carqaladeyn diyaarinta macallimiin u qalma dugsiyada deegaanka.

Intaa waxaa dheer, Mandheera ayaa xoojisay waxbarashada farsamada iyo xirfadaha gacanta , iyadoo sannadkan 782 arday ay iska diiwaangeliyeen imtixaannadooda halka dowladdu ay bixisay 3.2 milyan oo shilin Kenya ah oo ah khidmadaha imtixaanka, taas oo loogu talagalay 408 arday.

Waalidiinta iyo ardayda ayaa si diirran u soo dhoweeyay sii socoshada maalgelinta waxbarashada, iyagoo ku tilmaamay inay dhidibada u aasayso mustaqbal fursado badan xanbaarsan, una wanaagsan dhallinyarada Mandheera, waxayna ugu baaqeen dhammaan daneeyayaasha inay sii xoojiyaan iskaashiga si waxbarashadu u noqoto mid la heli karo, tayo leh, una adeegta baahiyaha bulshada.