Al-Shabaab oo xaqiijisay in hoggaamiye laga dilay

Soomaaliya, 09 Feberaayo 2026 (Dawan)— Kooxda Al-Shabaab ayaa xaqiijisay in hoggaamiye ka tirsan ururka, oo lagu magacaabo Sheekh Maxamed Abu Osaama, in lagu dilay duqeyn ay fuliyeen diyaaradaha Maraykanka.

Bayaan ay kooxda Al-Shabaab caawa oo Isniin sii baxayso soo saartay ayaa lagu sheegay in ninka la dilay uu hoggaaminayey guddiga gargaarka abaarta, isla markaana duqeynta lagu fuliyey hareeraha magaalada Bu’aale ee gobolka Jubbada Dhexe Axaddii.

Taliska Ciidamada Maraykanka ee Afrika (AFRICOM) weli kama aysan hadlin duqeynta, hase yeeshee Hay’adda Sirdoonka iyo Nabad-Sugidda Qaranka Soomaaliya (NISA) ayaa galabta war-saxaafadeed kooban ku sheegtay in ciidamadeeda oo kaashanaya saaxiibada caalamiga inay duqeyn ka fuliyeen aagga Saakow ee Gobolka Jubbada Dhexe.

NISA waxay xaqiijisay in hoggaamiye sare oo ka tirsan Al-Shabaab halkaas lagu dilay, iyada oo aan faahfaahin dheeraad ah la bixin.