AUSSOM oo garab-istaag u muujisay dhismaha Guddiga Difaaca Soomaaliya

Soomaaliya, 3 Febraayo 2026 (Dawan)— Hawlgalka Midowga Afrika ee Taageerada iyo Xasilinta Soomaaliya (AUSSOM) ayaa soo dhaweeyay Guddiga Difaaca cusub ee ay Dowladda Federaalka Soomaaliya ku dhawaaqday dhismihiisa shalay, isagoo sheegay in guddigan uu xoojin doono isku-duwidda hay’adaha amniga dalka.

Madaxa AUSSOM, Danjire El Hadji Ibrahima Diene, ayaa tallaabadan ku ammaanay munaasabad ka dhacday Muqdisho oo lagu dhisayey guddiga Isniintii, isaga oo ku tilmaamay mid muhiim u ah adkeynta hoggaaminta iyo lahaanshaha Soomaaliyeed ee maamul-wanaagga waaxda difaaca.

“Daah-furka Guddiga Difaaca waa tallaabo muhiim ah oo lagu xoojinayo hoggaaminta Soomaaliyeed iyo lahaanshaha maamul-wanaagga waaxda difaaca,” ayuu Diene ku sheegay bayaan.

Guddiga Difaaca, oo ay hoggaaminayso Wasaarada Gaashaandhigga, ayaa isu keenaya hoggaanka sare ee hay'adaha amniga Soomaaliya iyo saaxiibada caalmaiga ee taageerada ku bixiya amniga dalka.

Mas’uuliyiintu ayaa sheegay in guddigu diiradda saari doono xoojinta isku-xirka hay’adaha, qorsheynta istaraatiijiga ah, dabagalka, iyo isla-xisaabtanka waaxda difaaca, xilli ay Soomaaliya ku jirto dadaallo lagu adkeynayo qaab-dhismeedka amniga qaranka.

AUSSOM ayaa mar kale xaqiijisay inay si buuxda u taageerayso wax-ku-oolnimada Guddiga Difaaca, isla markaana ay garab-taagan tahay Dowladda Federaalka Soomaaliya dadaallada la xiriira xasillinta, la-wareegidda mas’uuliyadda amniga, iyo dib-u-habeynta hay’adaha ammaanka.

Tallaabadan ayaa imanaysa xilli Soomaaliya ay waddo qorsheyaal ay si tartiib ah ula wareegayso mas’uuliyadda amniga dalka, iyadoo hoos u dhac ku imaanayo doorka ciidamada caalamiga ah, gaar ahaan AUSSOM, oo muddada hawlgalkeedu uu dhammaanayo sanadkan.