Deni iyo Madoobe oo shaaciyey ujeeddada safarkooda Muqdisho

Muqdisho, 12 Febraayo 2026 ( Dawan)- Madaxweynayaasha dowlad-goboleedyada Puntland iyo Jubaland, Saciid Cabdullaahi Deni iyo Axmed Maxamed Islaam (Axmed Madoobe), ayaa si cad u sharaxay ujeeddada safarkooda caasimadda iyo aragtidooda ku aaddan mustaqbalka siyaasadeed ee dalka.

Madaxweynayaasha ayaa ujeedadooda ku shaaciyey xalay oo Arbaca ahayd, kadib kulan casho oo ay la qaateen xubno ka tirsan Golaha Mustaqbalka Soomaaliya iyo xildhibaano ka tirsan Baarlamaanka Federaalka.

Madaxweyne Saciid Cabdullaahi Deni ayaa sheegay in uu Muqdisho u yimid si uu u taageero midnimada dalka, isla markaana aanu rabin in Soomaaliya la kala qeybsado. Waxa uu intaas ku daray in aysan ka tagi doonin caasimadda ilaa dalka uu yeesho wajiga cusub ee horumarinta dowladnimada.

“Halkaan ka tagi mayno ilaa dalkaan weji kale uu yeesho, sidii hore la yeeli jirayna sidaas ayuu ahaa,” ayuu yiri Madaxweyne Deni.

Madaxweynaha Jubaland, Axmed Madoobe, ayaa xoogga saaray in imaanshahooda Muqdisho uu salka ku hayo sidii looga hortagi lahaa burbur ku yimaada dowladnimada Soomaaliya.

“Waan wada hadli doonnaa, nabad ayaan u nimid, xal in waddankan laga gaaro ayaan u nimid, mustaqbalka dowladnimada Soomaaliya in uusan burburin ayaan u nimid,” ayuu yiri Axmed Maxamed Islaam.

In kasta oo hoggaamiyeyaashu ku sugan yihiin caasimadda tan iyo 10-kii Febraayo, haddana waxaa jira hubanti la’aan ku saabsan jadwalka shirka iyo meesha uu ka dhacayo.

Ma jiro waqti rasmi ah oo la shaaciyey inuu furmayo shirkii weynaa ee wadatashiga, sidoo kalena dowladda Federaalka iyo Golaha Mustaqbalka weli ma soo saarin jadwal cad oo ku saabsan wadahadallada la filayo.