Muqdisho, 7 Febraayo 2026 (Dawan) – Baarlamaanka Federaalka Soomaaliya ayaa maanta oo Sabti ah yeeshay kalfadhi wadajir ah si ay uga doodaan wax-ka-beddelka lagu samaynayo dastuurka ku-meel-gaarka ah ee dalka, sida lagu sheegay bayaan ka soo baxay Golaha Shacabka.
Kulankan oo ka dhacay xarunta baarlamaanka, waxaa guddoominayay Cali Shacbaan Ibraahim, Guddoomiye ku-xigeenka koowaad ee Aqalka Sare, isagoo ay weheliyaan Guddoomiye ku-xigeenka 2-aad ee Golaha Shacabka Cabdullaahi Cumar Abshirow iyo Cabdullaahi Xirsi Tima-cadde, Guddoomiye ku-xigeenka 2-aad ee aqalka Sare.
Kalfadhiga ayaa diiradda lagu saaray wejiga labaad ee dib-u-eegista dastuurka iyo wax-ka-beddel kooban oo lagu samaynayo cutubka 4aad ee dastiuurka ku meel gaarka ah gaar ahaan Qodobbada 49-aad, 50-aad, iyo 54-aadee dastuurka . Guddiyada mas'uulka ka ah dib-u-eegista dastuurka iyo guddiga madaxa-bannaan ee dib-u-eegista dastuurka ayaa xildhibaannada siiyay faahfaahin ku saabsan isbeddellada la soo jeediyay ka hor inta aan doodda la bilaabin.
Xildhibaannada ayaa ka dooday talooyinkii ay soo jeediyeen guddiyada, sida lagu sheegay bayaanka. Guddoomiye ku-xigeen Cali Shacbaan Ibraahim ayaa soo xiray fadhiga, isagoo sheegay in dooduhu ay sii socon doonaan kulanka xiga ee loo qorsheeyay maalinta Isniinta ah.
