Dowlad Deegaanka oo daah-furtay mashruuc Koronto oo ku kacaya $1.58 Milyan

Jigjiga (Dawan)- Dawlad Deegaanka Soomaalida ayaa xarigga ka jartay mashruuc koronto oo ku kacaya 200 milyan oo birr ($1.58 milyan), kaas oo laga hirgeliyay degmada Dig ee gobolka Jarar. Tallaabadan ayaa qayb ka ah qorshaha ballaarinta tamarta la cusboonaysiiyo ee deegaannada fogfog.

Xaruntan cusub, oo soo saaraysa 350 kilowatts, ayaa loogu talagalay inay siiso degmada Dig koronto joogto ah oo 24-saac ah, taas oo horay u lahayd koronto aan laysku halayn karin.

Mashruuca ayaa si rasmi ah loo daah-furay iyadoo goobjoog ka ahaayeen mas’uuliyiin sarsare oo heer federaal iyo heer deegaan ah, oo ay ka mid yihiin Sultaan Wali, Wasiiru-dawlaha Biyaha iyo Tamarta ee Dawlad Deegaanka, iyo Axmed Shugri, Wasiirka Horumarinta Magaalooyinka iyo Dhismaha ee Deegaanka Soomaalida.

Wasiiru-dawle Wali oo ka hadlayay munaasabadda furitaanka ayaa ku tilmaamay mashruucan guul weyn oo laga gaaray dadaallada lagu isku xirayo dhaqaalaha miyiga iyo magaalooyinka, iyadoo loo marayo horumarinta kaabayaasha dhaqaalaha.

Mas’uuliyiinta deegaanka ayaa carrabka ku adkeeyay in xalka tamarta cadceedda la siinayo mudnaanta koowaad, gaar ahaan bulshooyinka ka fog khadka korontada ee biyaha laga dhaliyo .

Wasiir Shugri ayaa xaqiijiyay in Dig ay ka mid tahay 10 magaalo oo loo doortay barnaamijka ballaarinta tamarta la cusboonaysiiyo, kaas oo ujeeddadiisu tahay in la helo koronto waarta oo la isku halayn karo.

Mashruucan waxaa iska kaashaday Wasaaradda Biyaha iyo Tamarta ee Itoobiya, Xafiiska Horumarinta Magaalooyinka iyo Dhismaha ee Deegaanka Soomaalida, iyo Shirkadda Korontada ee Itoobiya (EEU).

Itoobiya ayaa sii wadda ballaarinta ilaha tamarta — oo markii hore u badnaa biyaha — iyadoo maalgelin ku samaynaysa mashaariicda cadceedda iyo dabaysha, si loo gaaro koronto lawada heli karo marka la gaaro sanadka 2030.