Dowladda oo Mucaaradka ku eedaysay khatar gelinta amniga Muqdisho

Muqdisho, 1-da Febraayo 2026 (Dawan)– Dowladda Federaalka Soomaaliya ayaa ku eedeysay xubno ka tirsan Madasha Mustaqbal inay isku dayeen inay gudaha magaalada Muqdisho soo geliyaan ciidan hubeysan.

War-saxaafadeed ka soo baxay Wasaaradda Amniga Gudaha ayaa lagu sheegay in dhacdadan ay xadgudub ku tahay nidaamyada loo dejiyey sugidda amniga Garoonka Caalamiga ah ee Aadan Cadde iyo guud ahaan amniga magaalada Muqdisho.

Wasaaradda ayaa xustay in mas’uuliyiintu ay wargeliyeen wakiillada Madasha Mustaqbal ee ku matalayey guddida qaban-qaabada shirka in “aan la aqbali karin ciidan iyo hub aan soo marin nidaamka saxda ah.”

Wasaaradda Amniga Gudaha waxay ku nuuxnuuxsatay in dowladda federaalka ay ka go’an tahay martigelinta wada-hadallada loo qorsheeyay jawi ammaan ah oo deggan. “Martiqaadka wada-hadalku sidii buu yahay,” ayay tiri wasaaraddu, iyadoo ku boorrisay xubnaha Madasha inay ixtiraamaan hab-maamuuska amniga.

Arrintan ayaa timid kadib markii Dowladda Federaalka Soomaaliya ay saakay celisay laba diyaaradood oo ka soo duulay Garoowe iyo Kismaayo, kuwaas oo siday ilaalo hordhac u ah madaxweynayaasha Jubbaland iyo Puntland.

Wada-hadalladan u dhaxeeya Dowladda iyo Madasha Mustaqbal ayaa qayb ka ah dadaallada socda ee lagu rabo in go’aan looga gaaro is mari waaga doorashada iyo Dastuurka.