Golaha Sare ee Muslimiinta Kenya oo ka digay xaaladda sii xumaaneysa ee abaarta

Kenya (Dawan) — Golaha Sare ee Muslimiinta Kenya ayaa ka digay xaaladda kasii dareysa ee abaarta ka jirta dalkaas, isagoo sheegay in xaaladdu aysan ahayn caqabad la xiriirta beeraha oo kaliya, balse ay isu beddeshay masiibo bini’aadantinimo oo halis gelinaysa jiritaanka bulshooyinka ugu nugul.

Guddoomiyaha Golaha, Xaaji Xasan Ole Naado, oo shir jaraa’id qabtay, ayaa sheegay in Kenya ay wajahday xaalad adag oo u baahan tallaabooyin degdeg ah oo go’aan adag leh oo ay qaaddo dowladda.

“Abaarahan hadda jira kuma koobna oo kaliya dalagyada beeraha, balse waa masiibo bini’aadantinimo oo burburinaysa isku-xirka bulsho iyo dhaqaale ee bulshooyinkeenna,” ayuu yiri Naado.

Isagoo tixraacaya warbixintii ugu dambeysay ee abaarta Kenya ee ay soo saareen Isbahaysiga Caalamiga ah ee Laanqayrta Cas iyo Bisha Cas, Goluhu wuxuu sheegay in si weyn ay u kordheen qoysaska wajahaya cunto-yari muddadii u dhexeysay Febraayo ilaa Maarso 2025, marka loo eego xilliyadii hore.

Naado ayaa ka digay in cunto iyo biya yarida ay ka dhalan karto cawaaqib aad u halis ah haddii aan si degdeg ah wax looga qaban, isagoo xusay inay jirto cabsi ah in la waayo nolosha dad iyo xoolaha haddii aan si degdeg ah wax looga qaban.

Golaha ayaa ugu baaqay dowladda Kenya inay si degdeg ah u abaabusho dhammaan dadaallada la heli karo, oo ay ku jiraan booyadaha biyaha ee Hay’adda Adeegga Dhallinyarada Qaranka, Ciidamada Difaaca Kenya, iyo Wasaaradda Kheyraadka Biyaha, si loo yareeyo dhibaatada ka taagan deegaannada ay abaartu saameysay.

Goluhu wuxuu tilmaamay in xaaladda ay uga sii dartay xilli-roobaadkii gaabnaa ee u dhexeeyay Oktoobar iyo Diseembar 2024, taas oo keentay hoos u dhac weyn oo ku yimid wax-soo-saarka beeraha iyo helitaanka biyaha.

“Saameynta abaartu kuma koobna gaajo oo kaliya, balse waxay si toos ah u taabanaysaa caafimaadka, waxbarashada, iyo xasilloonida dhaqaale ee bulshooyinkeenna,” ayuu yiri Naado.

Ugu dambeyntii, Golaha Sare ee Muslimiinta Kenya ayaa ka codsaday Madaxweynaha Kenya, William Ruto, inuu si rasmi ah ugu dhawaaqo abaarta xaalad degdeg qaran, isagoo ku adkeeyay in baaxadda masiibadu ay ka weyn tahay awoodda wax-ka-qabashada caadiga ah.

Iyada oo ay soo dhowdahay bisha barakaysan ee Ramadaan, goluhu wuxuu ku baaqay midnimo iyo isu-gargaarka bulshada, isagoo ka dalbaday dowladda dhexe, ismaamullada, hay’adaha bini’aadantinimada, hay’adaha Islaamiga ah, iyo dadka wax haysta inay si wadajir ah oo degdeg ah u gargaaraan bulshooyinka ay abaartu saameysay.