Muqdisho, Janaayo 29, 2026 (Dawan)– Golaha Wasiirrada Soomaaliya ayaa maanta oo Khamiis ah ansixiyay Xeer-nidaamiyaha Diiwaangelinta Gaadiidka Badda,, kaas oo lagu doonayo in dib-u-habeyn lagu sameeyo waaxda badda ee dalka.
Wasiirka Dekedaha iyo Gaadiidka Badda, Cabdulqaadir Maxamed Nuur, ayaa soo dhaweeyay go’aanka, isagoo sheegay in dib-u-habeyntani wax ka qabaneyso caqabado muddo dheer ka jiray waaxda badda ee Soomaaliya.
Xeer-nidaamiyaha Diiwaangelinta Gaadiidka Badda, oo ay soo jeedisay Wasaaradda Dekedaha iyo Gaadiidka Badda, ayaa dhisaya nidaam sharciyeed mideysan oo loogu talagalay maraakiibta ku socda calanka Soomaaliya, xoojinaya heerarka badbaadada iyo kormeerka, isla markaana hubinaya u hoggaansanaanta heshiisyada caalamiga ah ee badda, sida uu sheegay wasiirka Dekedaha.
“Xeerarkani waxay dhisayaan nidaam sharciyeed mideysan oo loogu talagalay maraakiibta ku socda calanka Soomaaliya, waxayna xoojinayaan heerarka badbaadada iyo kormeerka, ilaalinayaan sumcadda calanka, isla markaana hubinayaan u hoggaansanaanta heshiisyada caalamiga ah ee badda,” ayuu Nuur ku sheegay qoraal uu ku daabacay bartiisa X (Twitter).
