Soomaaliya, 4 Febraayo 2026 (Dawan)— Hoggaanka milatariga Soomaaliya ayaa maanta oo Arbaco ah isbedel ku dhacay, iyadoo Sarreeye Guuto, Ibrahim Maxamed Maxamuud uu xilka kala wareegay Sarree Gaas, Odowaa Yuusuf Raage, munaasabad ka dhacday xarunta Wasaaradda Gaashaandhigga ee Muqdisho.
Ra’iisul Wasaaraha Soomaaliya, Xamsa Cabdi Barre, ayaa xilka u kala wareejiayay labada Taliye, iyadoo goobjoog ahaayeen Wasiirro uu ka mida yahay Wasiirka Gaashaandhigga Axmed Macallin Fiqi,Taliyayaal hore, taliska qeybihiisa kala duwan iyo wakiillo ka socday dowladaha Soomaaliya ka taageera dhinaca diafaaca.
Janaraal Ibrahim, oo ka mid ah jiilka cusub ee saraakiisha wax kusoo baratay dalka Turkiga ayaa noqday taliyihii sideedaad ee Ciidanka Xoogga Dalka Soomaaliyeed tan iyo 2012. Khudbadiisii ugu horreysay, wuxuu ku ballan-qaaday xoojinta tababarrada, awoodda hawlgallada, iyo nidaamka xirfadeed ee ciidanka, isagoo sii ambaqaadaya dib-u-habaynta loo samaynayo askarta iyo qoysaskooda.
“Waxaan diiradda saari doonaa xoojinta qaab-dhismeedka iyo tayada dhammaan talisyada ciidanka, oo ay ku jiraan ciidamada gaarka ah, si kor loogu qaado awoodda hawlgallada ee Ciidanka Xoogga Dalka Soomaaliyeed. Waxaan ka shaqayn doonaa sidii loo heli lahaa tiro iyo tayo suubban, anigoo sii wadi doona dib-u-habaynta horay loo hirgeliyey,” ayuu yiri Janaraal Ibrahim.
