Imisa shirkadood oo dalxiis ah ayaa dowladda u diiwaangashan?

Muqdisho (Dawan)— Iyadoo dalxiiska Soomaaliya uu muujinayo kobac isa soo taraya, Dowladda Federaalka Soomaaliya ayaa shaacisay in ilaa iyo hadda ay si rasmi ah isu diiwaangeliyeen 10 shirkadood oo ka shaqeeya dalxiiska, kuwaas oo ka howlgala deegaanno kala duwan oo ka tirsan maamul-goboleedyada dalka.

Lataliyaha Dalxiiska ee Wasaaradda Warfaafinta, Dhaqanka iyo Dalxiiska, Yaasir Baafo, ayaa sheegay in shirkadahan dhammaantood ay ka diiwaangashan yihiin wasaaradda, isla markaana ay haatan ku mideysan yihiin sameynta urur ay wadaagaan.

Yaasir Baafo oo wareysi gaar ah siiyay warbaahinta Dawan ayaa xusay in xukuumaddu ay waddo qorshe ballaaran oo lagu diyaarinayo shuruuc iyo nidaamyo rasmi ah oo hagaya habka ay shirkadahan u soo dhoweyn karaan dalxiisayaasha ajaanibta ah ee imanaya dalka.

“Shirkadaha si rasmi ah dowladda ugu diiwaangashan, gaar ahaan kuwa hoos yimaada Wasaaradda Dalxiiska, waxay haatan gaarayaan ilaa 10 shirkadood, waana kuwo ku mideysan horumarinta dalxiiska dalka,” ayuu yiri Yaasir Baafo.

Lataliyaha ayaa sidoo kale tilmaamay in Wasaaradda Warfaafinta, Dhaqanka iyo Dalxiiska ay dejisay xeerar waajib ah oo dalxiisayaasha laga doonayo inay maraan marka ay soo galayaan dalka, si loo ilaaliyo amniga, dhaqanka, diinta iyo qiyamka bulshada Soomaaliyeed.

“Waxaa lama huraan ah in dalxiisayaasha imanaya dalka ay u hoggaansamaan shuruucda iyo nidaamyada dowladda dejisay, kuwaas oo looga gol leeyahay ka hortagga wax kasta oo lid ku ah dhaqanka, diinta iyo bulshada,” ayuu hadalkiisa ku daray.

Dowladda Soomaaliya ayaa sheegtay in kobaca dalxiiska uu horseeday baahi loo qabo sharciyo casri ah oo nidaamiya dhaqdhaqaaqa dalxiisayaasha. Sida ay Wasaaradda Warfaafinta shaacisay, 13-kii sano ee la soo dhaafay waxaa dalka soo booqday in ka badan 67,000 oo dalxiisayaal ajaanib ah, taasoo muujinaysa kororka xiisaha caalamiga ah ee dalxiiska Soomaaliya.

Tiradan ayaa si cad u muujinaysa in Soomaaliya ay si tartiib tartiib ah ugu soo laabanayso khariidadda dalxiiska gobolka, iyadoo la xoojinayo nidaamka, sharciyeynta, iyo ammaanka dalxiisayaasha.