Hargeysa ( Dawan) — Ra’iisul wasaaraha Israa’iil, Benjamin Netanyahu, ayaa ku dhawaaqay in Israa’iil ay si rasmi ah u aqoonsatay Somaliland inay tahay dal madax-bannaan oo leh qarannimo buuxda, taas oo noqotay aqoonsigii ugu horreeyay ee ay Somaliland ka hesho caalamka.
" Waxaan maanta ku dhawaaqay aqoonsiga rasmiga ah ee Jamhuuriyadda Somaliland inay tahay dal madax-bannaan oo leh qarannimo buuxda" ayuu yiri, ra'iisul wasaaraha Israa’iil
Aqoonsigan ayaa la shaaciyay kaddib kulan muuqaal ah oo dhex maray raiisul wasaaraha Israa’iil iyo Madaxweynaha Somaliland, Cabdiraxmaan Maxamed Cabdullaahi (Cirro), iyadoo labada dhinac ay kala saxiixdeen bayaan wadajir ah oo ku dhisan aqoonsi is-dhaafsi ah iyo dhisidda xiriir rasmi ah.
Ra’iisul wasaaraha Israa’iil ayaa tilmaamay in bayaankan uu ku saleysan yahay qiyamka heshiisyadii Abraham Accords, oo horay Israa’iil ula saxiixatay dhowr dal oo Carbeed xilligii hore ee madaxweynaha Mareykanka Donald Trump, isaga oo ku tilmaamay tallaabadan mid u adeegaysa xasilloonida iyo nabadda gobolka.
Netanyahu ayaa hambalyo u diray Madaxweynaha Somaliland, isaga oo ammaanay hoggaamintiisa iyo doorkiisa ku aaddan xasilloonida iyo nabadda, isla markaana casuumaad rasmi ah u fidiyay si uu booqasho ugu tago Israa’iil
Sida lagu sheegay bayaanka, Israa’iil waxay qorsheyneysaa inay si degdeg ah u ballaariso xiriirka ay la leedahay Somaliland, iyadoo diiradda saaraysa iskaashi ballaaran oo dhinacyada beeraha, caafimaadka, tiknoolajiyadda iyo dhaqaalaha ah.
