Jabuuti (Dawan)- Ciidanka Ilaalada Xeebaha Jabuuti ayaa Khamiistii xaqiijiyay in laba qof oo doontoodu ku degtay Gacanka Tadjourah horraantii toddobaadkan la soo badbaadiyay.
Shilku wuxuu dhacay fiidnimadii 1-da Febraayo, markii doon kalluumeysiga yaryar ah oo ka soo baxday Tadjourah kuna socotay magaalada Jabuuti ay waxyeello kasoo gaartay salka doonta ah xilli ay mareysay meel u dhow Khor Ambado, saacaddu markay ahayd 10:00 PM. Mas’uuliyiinta ayaa sababta degitaanka doonta ku sheegay “xaalkeeda guud ee liitay ” taasoo keentay in awooddeeda sabbaynta ay si tartiib ah u lumiso, isla markaana doontu ku dhacdo dhagax ka hor inta aysan rogman.
Waaxda warfaafinta Ciidanka Ilaalada Xeebaha ayaa sheegtay in badbaadada degdegga ah iyo isku-xirnaanta kooxaha ay u suurtagelisay in labada qof ee saarnaa doonta si nabad ah loo soo badbaadiyo, kadibna la geeyay xarun lagu siiyo gargaarka degdegga ah.
"Badbaadada degdegga ah iyo howlgallada isku xiran waxay u suurtageliyeen [kooxaha] inay helaan oo ay soo badbaadiyaan labada qof ee saarnaa doonta, kuwaas oo la badbaadiyay iyagoo nabad qaba," ayaa lagu yiri qoraal kasoo baxay waaxda warfaafinta.
Ciidanka ayaa sidoo kale ku boorriyay dhammaan dadka isticmaala badda in ay hubiyaan doonyahooda ka hor safarka, isla markaana u hoggaansamaan xeerarka badqabka badda.
