Jabuuti, 25 Janaayo 2026 (Dawan) — Dowladda Jabuuti ayaa maanta oo Axad ah dib u xaqiijisay go’aankeeda adag ee ku aaddan ciribtirka gudniinka fircooniga ah, iyadoo xoogga saartay ka hortagga, daryeelka dhibbanayaasha iyo xoojinta isku-duwidda hay’adaha dowladda iyo kuwa caalamiga ah.
Kulan ka dhacay Qasriga Shacabka, oo ay guddoominaysay Wasiirka Haweenka iyo Qoyska, Muna Cusmaan Aadan, ayaa lagu falanqeeyay dadaallada lagu xoojinayo la-dagaallanka gudniinka fircooniga ah. Kulanka waxaa ka qeyb galay xubnaha guddiga qaran ee isku-duwidda, wakiillo ka socday wasaarado kala duwan iyo hay’ado caalami ah, oo ay ku jirto Sanduuqa Qaramada Midoobay ee Dadweynaha (UNFPA).
Mas’uuliyiinta ayaa sheegay in gudniinka fircooniga ah uu yahay dhaqan ku xadgudba xuquuqda aadanaha, isla markaana saameyn taban oo waqti dheer leh ku yeesha caafimaadka, maskaxda iyo karaamada gabdhaha iyo haweenka. Dowladda Jabuuti ayaa arrintan u aqoonsatay mudnaan qaran, iyadoo dejisay sharciyo si cad u mamnuucaya dhaqankan, kuwaas oo ay weheliyaan siyaasado lagu ilaalinayo carruurta laguna horumarinayo xuquuqda haweenka.
"Jabuuti gudaheeda, la-dagaallanka gudniinka fircooniga ah waa mudnaan qaran oo lagu caddeeyay siyaasadaha guud,” ayay Wasaaradda Haweenka iyo Qoyska ku tiri bayaan
