Jabuuti (Dawan) — Saraakiisha Kastamka Jabuuti ayaa gacanta ku dhigay afar nin, kuwaas oo mid ka mid ah uu liqay 29 kaabsal oo daroogada kookayn ah, kaddib howlgallo amni oo laga sameeyay xuduudka Balho ee ay Jabuuti la wadaagto dalka Itoobiya.
Howlgalkan ayaa dhacay fiidnimadii 28-ka Janaayo, gobolka Tadjourah, meel u dhow Kastamka Balho, kaddib markii ciidamada ilaalada xuduudda ay joojiyeen afar nin oo asal ahaan ka soo jeeda dalka Chad, kuwaas oo isku dayayay inay si sharci-darro ah ku soo galaan gudaha Jabuuti.
Saraakiisha kastamka ayaa sheegay in ay ka shakiyeen dhaqdhaqaaqa raggaasi, taas oo keentay in lagu tuhmo isticmaalka habka loo yaqaan liqidda maandooriyaha (body packing), oo ah farsamo ay si joogto ah u adeegsadaan shabakadaha daroogada ka ganacsada ee ka hawlgala gobolka.
Afarta eedeysane ayaa loo qaaday Isbitaalka Gobolka Tadjourah, halkaas oo lagu sameeyay baaritaanno caafimaad, kuwaas oo xaqiijiyay in mid ka mid ah tuhmanayaasha ay calooshiisa ku jireen kaabsallo kookayn ah.
