Kismaayo (Dawan)- Dowlad-Goboleedka Jubaland ayaa si cad u beeniyay hadal ka soo baxay Wasaaradda Caddaaladda iyo Arrimaha Dastuurka ee Dowladda Federaalka Soomaaliya, kaas oo lagu sheegay in Jubaland ay ka qaybqaadatay wadatashiyada dib-u-eegista Dastuurka.
War-saxaafadeed ay soo saartay Wasaaradda Caddaaladda iyo Arrimaha Dastuurka ee Jubaland ayaa lagu sheegay in Dowladda Federaalka ay qaaday tallaabooyin ay ku tilmaamtay kuwo sharci-darro ah, isla markaana aan waafaqsanayn habraacyada dastuuriga ah ee lagu heshiiyay, kuwaas oo dhigaya in dowlad-goboleedyada xubnaha ka ah federaalka lala tashado.
“Wax kasta oo lagu sameeyo Dastuurka iyada oo aan lala tashan dowlad-goboleedyada xubnaha ka ah ma laha sharci, mana aqoonsan doono Jubaland,” ayaa lagu yiri war-saxaafadeedka.
