Jubaland oo sheegtay in deegaanadeeda aan looga dhaqmi doonin dastuurka la bedelay

Soomaaliya, 8 Febraayo 2026 (Dawan)– Dowlad-goboleedka Jubaland ayaa ku eedeeyay Dowladda Federaalka Soomaaliya inay ka leexatay habraacyadii dastuuriga ahaa, isla markaana ay waddo dadaallo hal-dhinac ah oo lagu doonayo in wax-ka-beddel lagu sameeyo Dastuurka Kumeelgaarka ah ee dalka.

Bayaan ay Jubaland soo saartay Sabtidii ayaa lagu sheegay in tallaabooyinka ay qaadayso dowladda federaalka ay “halis gelinayaan jiritaanka Dowlad-goboleedka Jubaland iyo heshiiskii dastuuriga ahaa” ee ay horey u ansixiyeen dhammaan daneeyayaasha Soomaaliyeed.

“Dowladda Jubaland waxay caddeyneysaa in aan deegaanadeeda iyo shacabka reer Jubaland lagu dhaqi doonin dastuur aan loo dhammayn, isla markaana ay koox gaar ahi samaysanayso,” ayaa lagu yiri bayaanka.

Jubaland ayaa sidoo kale sheegtay in xildhibaanno ka soo horjeeda wax-ka-beddelka la soo jeediyay ay la kulmeen cabsi-gelin iyo cadaadis, iyadoo mas’uuliyadda arrintaas dusha ka saartay hoggaanka Dowladda Federaalka ee uu Madaxweyne Xasan Sheekh Maxamuud madaxda ka yahay.

Bayaankan ayaa soo baxay kaddib markii Baarlamaanka Federaalka Soomaaliya uu Sabtidii yeeshay fadhi wadajir ah oo lagu gorfeeyay isbeddello lagu samaynayo qodobo muhiim ah oo ka mid ah Dastuurka Kumeelgaarka ah, gaar ahaan qaybo ka mid ah Cutubka Afaraad, iyo guud ahaan Cutubyada Shanaad ilaa Sagaalaad, oo ay ku jiraan Qodobbada 49, 50 iyo 54, kuwaas oo si toos ah u taabanaya qaab-dhismeedka dowladda iyo habraacyada doorashooyinka.