Kalluumeysatada Boosaaso oo helay fursad ay ku hormariyaan wax-soo-saarkooda

Boosaaso (Dawan) – Madaxweyne Ku-xigeenka Puntland, Ilyaas Cismaan Lugatoor, ayaa si rasmi ah Axaddii u daah-furay Mashruuca Goobta Horumarinta Qaybta Kalluumeysiga ee Boosaaso, oo ah hindise loogu talagalay in lagu xaqiijiyo kheyraadka badda ee gobolka, si loo abuuro shaqooyin loona kobciyo kororka dhaqaalaha.

Munaasabadda daah-furka waxaa ka soo qaybgalay mas’uuliyiin ka tirsan dowlad goboleedka Puntland, Safiirka Talyaaniga u fadhiya Soomaaliya, Pier Mario Dacco’ Coppi. iyo Valeria Buoninfante, madaxa Hay’adda Talyaaniga ee Iskaashiga Horumarinta (AICS) ee Soomaaliya.

Hindisahan waxaa fulinaya Ururka Horumarinta Warshadaha ee Qaramada Midoobay (UNIDO), isagoo kaashanaya urur maxalli ah oo kalluumeysiga ah, isla markaana taageero dhaqaale ka helaya Hay’adda Talyaaniga ee Iskaashiga Horumarinta.

Mashruucu wuxuu bulshooyinka kalluumeysiga ee Boosaaso siin doonaa taageero farsamo iyo teknoolojiyad horumarsan, isagoo sidoo kale dhiirrigelinaya fursadaha ganacsi iyo maalgashi waara ee Dhaqaalaha Buluugga ah ee Soomaaliya.

“UNIDO iyo Wasaaradda Kalluumeysiga waxaa laga rajeynayaa in mashruucan uu albaab u furo maalgelin xoog leh oo horumarineed,” ayuu yiri Madaxweyne Ku-xigeen Lugatoor. Wuxuu ku dhiirrigeliyay bulshada inay mudnaanta siiyaan maalgashiga qaybaha muhiimka ah ee dhaqaalaha, oo ay ku jiraan kalluumeysiga casriga ah, beeraha, iyo xoolaha.

Sidoo kale, iskaashiga lala yeeshay Federpesca ee Talyaaniga – oo ah ururka qaran ee shirkadaha kalluumeysiga – ayaa ka caawinaya Soomaaliya inay la xiriirto shirkadaha Talyaaniga iyo Yurub, si loo dhiirrigeliyo maalgashi, iskaashi, iyo horumarinta qaybta kalluumeysiga.

Mashruuca, oo billowday 18-ka Noofambar 2025, ayaa la filayaa inuu socdo illaa 30-ka Agoosto 2028, wuxuuna qayb ka yahay dadaallada ballaaran ee Soomaaliya loogu abuuro fursado dhaqaale oo waara, iyadoo la xoojinayo Dhaqaalaha Buluugga ah.