Jigjiga (Dawan)– Maamulka Dowlad-Deegaanka Soomaalida ayaa Sabtidii la dhagaxdhigay mashaariic waaweyn oo kanaallo waraab ah, kuwaas oo laga hirgelinayo degmooyinka Godey iyo Cadaadle, si kor loogu qaado wax-soo-saarka qamadiga loona yareeyo ku tiirsanaanta matoorada shidaalka ku shaqeeya ee ku baxo kharashka badan.
Mashaariicdan, oo ka kooban laba kanaal oo mid walba dhererkiisu yahay 4.3 kiiloomitir, ayaa si rasmi ah waxaa dhagax-dhigay Agaasimaha Waaxda Beeraha ee dowlad-deegaanka, Cabdullaahi Maxamed Muuse, isaga oo ay weheliyaan Guddoomiyaha Gobolka Shabeelle Cabdi Faarax iyo masuuliyiin kale oo ka tirsan maamulka.
Kanaalladan cusub ayaa bixin doona marka la hirgeliyo waraab ku shaqeeya cufis-jiid (gravity-fed irrigation), kuwaas oo gaarsiin doona biyo qiyaastii 278 hectare oo dhul beereed ah. Marka ay dhammaadaan, waxaa la filayaa in ay si toos ah uga faa’iideystaan ku dhowaad 1,112 qoys oo beeraley ah oo ku nool dooxada Webiga Shabeelle, oo ka mid ah meelaha ugu nugul abaarta.
