Kenya (Dawan) – Maalqabeen Turki ah oo lagu magacaabo Elsek Cusmaan ayaa wajahaya baaritaanno ballaaran, kaddib markii lagu eedeeyay inuu dharbaaxay Guddoomiyaha Ismaamulka Wajeer, Axmed Cabdullaahi, oo uu dhaxmaray khilaaf xooggan.
Warbaahinta maxalliga ah ayaa ku warrantay in dhacdadu ay dhacday 6-da Febraayo 2026, xilli la sheegay in Cusmaan uu laba dharbaaxo ku dhuftay Guddoomiyaha Wajeer, ka hor inta aysan booliisku kala dhexgelin. Eedeynta ayaa lala xiriirinayaa muran hore oo la sheegay inuu ka dhashay shil dhacay 13-kii Janaayo 2026, kaas oo ay ku lug lahaayeen mas’uuliyiinta ismaamulka, oo uu ka mid ahaa guddoomiyuhu.
Booliiska Kenya ayaa intaa kaddib xiray Elsek Cusmaan iyo muwaadin kale oo Turki ah oo lagu magacaabo Gokmen Sandikci, kuwaas oo lagu qabtay deegaanka Mtwapa ee gobolka Kilifi, halkaas oo ay weli ku jiraan xabsi ku-meel-gaar ah iyadoo baaritaannadu socdaan.
Cusmaan, oo 62 jir ah, ayaa muddo dheer ku noolaa dalka Kenya, waxaana lagu yaqaannaa inuu yahay maalqabeen leh maalgashi lagu qiyaasay 6 bilyan oo shilin Kiini ah (qiyaastii 47 milyan oo doollar). Marka laga soo tago eedda dharbaaxada, waxa kale oo socda baaritaanno la xiriira tuhunno ku saabsan maalgelinta argagixisada, inkasta oo uu si cad u beeniyay eedeymahaas isaga iyo qareennadiisuba.
