Muqdisho, 7 Febraayo 2026 (Dawan) – Madaxtooyada Soomaaliya ayaa xalay oo Jimco ah si kulul u beenisay hadal uu sheegay madaxweynihii hore, Maxamed Cabdullaahi Farmaajo, oo ku saabsanaa inuu wadahadal dhanka telefoonka ah oo dhexmaray Madaxweyne Xasan Sheekh Maxamuud, in looga dalbaday in la joojiyo ololaha “Mahadsanid Madaxweyne”.
Barnaamij dokumentari ah oo Jimcihii laga baahiyay Abdijalil Show, ayuu Farmaajo ku sheegay in Madaxweyne Xasan Sheekh Maxamuud uu si shakhsi ah ula soo xiriiray, kana codsaday in la joojiyo ololaha cinwaankiisu ahaa “Mahadsanid Madaxweyne”. Farmaajo wuxuu intaa ku daray in madaxweynaha hadda talada haya uu ka cabsi qabay in ololahaasi hoos u dhigo taageerada shacabka ee dowladda cusub.
Cabdicasiis Goolfyare, Agaasimaha Xafiiska Warfaafinta iyo Xiriirka Warbaahinta Madaxtooyada Soomaaliya, ayaa qoraal uu ku baahiyay baraha bulshada ku beeniyay hadalka Farmaajo, isagoo ku tilmaamay mid “runta ka fog” isla markaana lagu raadinayo hadal-hayn warbaahineed.
“Ma jiro wax wadahadal ah oo dhex maray Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, iyo madaxweynihii hore Maxamed Cabdullaahi Farmaajo oo ku saabsan olololaha ama dhismaha guriga la sheegay in Marko looga dhisay,” ayuu qoraalkiisa ku yiri, Goolfyare.
Agaasimaha ayaa intaas ku daray in muddada uu Farmaajo sheegay in Madaxweyne Xasan Sheekh Maxamuud uu ku mashquulsanaa hawlo mudnaan qaran leh, oo ay ka mid yihiin: dagaalka ka dhanka ah kooxda Al-Shabaab, dhammaystirka geeddi-socodka cafinta deynta, iyo xaqiijinta in Soomaaliya laga qaado cunaqabatayntii hubka ee Qaramada Midoobay saarnayd muddada dheer.
